Башҡортостан
-10 °С
Болотло
VKOKРУС
Бөтә яңылыҡтар
Иман
4 Март , 10:13

Иңдәренә ауыр йөк һалмағыҙ

pixabay.com
Фото:pixabay.com

“Ҡөрьән Кәрим”дә гүзәл заттың хоҡуҡтары, бурыстары билдәләнгән айырым сүрә – “Ән-Ниса” – бар. Унда ғаилә ҡороу, тормош көтөү, мираҫ, башҡалар менән мөнәсәбәт ҡороу һәм башҡа мәсьәләләр аныҡ зекер ителгән.

Был – Исламда әсәнең, ҡатын-ҡыҙҙың дәрәжәһе юғарылығына ныҡлы дәлил. Пәйғәмбәребеҙ Мөхәммәт ғәләйһис-сәләмдең һуңғы тапҡыр хаж ҡылғанда һөйләгән хушлашыу вәғәзендә “Ҡатын-ҡыҙҙың хаҡын үтәгеҙ!” тип бер нисә тапҡыр ҡабатлауы ла – оло аманат.

Динебеҙҙә әйтелгәнсә, йәшәйеште дауам иткән, халыҡ һанын арттырған, милләткә, дингә, нәҫеленә көс-ҡеүәт өҫтәгән, ғаилә усағын һүндермәй һаҡлаған, телһөйәр, илһөйәр, әҙәпле, әхлаҡлы балалар үҫтергән, уларҙың киләсәген ҡайғыртҡан, күркәм тәрбиә ҡанундарын дауам иттергән, иренә терәк-таяныс булған һәм башҡа бихисап бурыстарҙы иңенә йөкмәгән әсәйҙәр, ҡатын-ҡыҙҙар ҡәҙер-хөрмәткә күмелеп йәшәргә хоҡуҡлы. Нескә яурындарға көслө зат күтәрергә тейешле ауыр йөктө һалмаһағыҙ ине, мөхтәрәм ир-ат. Әсәйҙәрҙең, ҡатын-ҡыҙҙың тән һәм рухи сәләмәтлеген ҡайғыртмаһағыҙ, улар аҡыллы, зиһенле, иманлы, илһөйәр, һөнәрле, әхлаҡлы балалар үҫтерә алмаҫ. Һөҙөмтәлә үҫешебеҙгә хәүеф янар. Милләтебеҙҙең, телебеҙҙең, мәҙәниәтебеҙҙең һәм башҡа рухи ҡиммәт­тәребеҙҙең киләсәге тап әсәләр ҡулында бит. Уларҙың күңел балҡышы, тышҡы матурлығы менән тирә-йүнгә наҙ, нур таратып йәшәй икән, иншаллаһ, тормошобоҙ ҡотло, килә­сәгебеҙ яҡты, ныҡлы булыр.

Дилбәр ИШМОРАТОВА 

Читайте нас в