Рамаҙан айын республикабыҙ райондарында йыл да халыҡ ихлас ҡаршы ала, ураҙа тоторға ниәт иткәндәр сафы артҡандан-арта. Был ваҡытта берҙәм саралар уҙғарыу ҙа йолаға инә бара.
Мәҫәлән, Нуриманда изге айҙы күмәкләп ҡаршы алдылар: Ҡыҙыл Яр ауылындағы мәҙәниәт йортонда ойошторолған “Рамаҙан тирмәһе”нә тотош район мосолмандары йыйылды. Урындағы мөхтәсибәт бындай сараны инде икенсе йыл уҙғара.
“Рамаҙан тирмәһе” Ҡөрьән уҡыуҙан башланды. Унан район хакимиәте башлығы Вилдан Ситдиҡов сығыш яһап, йыйылған халыҡты изге ай башланыуы уңайынан ҡотланы, фарыз ғәмәлдәрҙе үтәүҙә тәҡүәлек, сабырлыҡ теләне. Артабан һүҙ алған имам-мөхтәсиб Мөхәммәдислам Сәлихов “Рамаҙан тирмәһе”нең Нуриман халҡы өсөн күркәм йолаға әйләнеп барыуын билдәләне, сараны ойоштороуға көс һалған, унда ҡатнашҡан һәр кемгә рәхмәт белдерҙе.
Осрашыуға Башҡортостан мосолмандары Диниә назараты рәйесе мөфтөй Айнур хәҙрәт Бирғәлин дә саҡырылғайны. Ул бөгөнгө йәмғиәттә мосолмандарҙың өлөшө тураһында вәғәз һөйләне. “Рамаҙан – Аллаһ Тәғәлә тарафынан билдәләнгән иң яҡшы ай, – тине ул сығышында. – Мосолмандар ҙа йәмғиәттең иң яҡшы ағзалары, илдең лайыҡлы граждандары булырға тейеш”.
Айырым бүлмәлә балалар өсөн Ислам нигеҙҙәре тураһында викторина үткәрелде. Унда ҡатнашҡан һәр кемгә – китап, еңеүселәргә иһә ҡиммәтле приздар, миҙалдар, сертификаттар бүләк ителде. Уларҙы мөфтөй Айнур Бирғәлин тапшырып, артабан да тырышып белем алырға, яуланған уңыштар менән ҡәнәғәтләнеп, туҡталып ҡалмаҫҡа саҡырҙы.
“Рамаҙан тирмәһе” урындағы ашнаҡсылар әҙерләгән тәмле былаулы ифтар менән тамамланды. Ойоштороусылар әйтеүенсә, бындай саралар дауам итәсәк.
* * *
Балалар тигәндән, уларҙы иман юлына яҡынайтыу ниәтендә башҡа райондарҙа ла күркәм саралар уҙғарылып тора. Мәҫәлән, күптән түгел Көйөргәҙенең Яҡшембәт ауылы иман йортонда “Минең хыялымдағы мәсет” тип аталған һүрәттәр конкурсында ҡатнашҡандарға дипломдар, бүләктәр тапшырылды.
Ойоштороусылар әйтеүенсә, унда Көйөргәҙе районынан, Күмертау, Өфө ҡалаларынан 3 – 16 йәшлек 68 бала һынау тотҡан. Улар үҙ хыялында йөрөткән мәсеттең һүрәтен төшөргән. Конкурста ҡатнашҡандарҙы бүләкләү тантанаһында мәсеттең имам-хатибы урындағы эшмәкәрлек тураһында һөйләне, өлкәндәр менән бер рәттән балаларҙың да дин нигеҙҙәрен ихлас өйрәнеүен билдәләне.
Еңеүселәр өсөн бағыусылар ярҙамында приздар, бүләктәр әҙерләнгәйне. Уларҙы Көйөргәҙе районы һәм Күмертау ҡалаһы имам-мөхтәсибе Айнур хәҙрәт Ҡәҙимов тапшырып, балаларға хыялындағы мәсетен киләсәктә ысынбарлыҡҡа ашыра алыуҙарын – ғибәҙәтхана төҙөрлөк иманлы, бай, ғилемле, йомарт, мәрхәмәтле булып үҫеүҙәрен теләне. Артабан ул ошо малай-ҡыҙҙарҙың дин нигеҙҙәре буйынса белемен тикшереп ҡарау ниәтендә викторина үткәрҙе. Вәғәзендә иһә ир-ат өсөн мәсеткә йөрөүҙең мөһимлеге, балаларҙың рухи-әхлаҡи үҫешенә булышлыҡ итеүе тураһында һөйләне.
* * *
Мосолман ҡәрҙәштәребеҙ балаларҙы спортҡа йәлеп итеүгә лә ҙур иғтибар бүлә. Мәҫәлән, Дәүләкән ҡалаһында былтыр эш башлаған мәҙәни-спорт комплексында Рамаҙан айына бүләк рәүешендә йәш быуын өсөн айырым спорт залы асылды. Бинала шулай уҡ намаҙ уҡыу бүлмәһе, дин дәрестәре биреү кабинеты, мохтаждарға ярҙам йыйыу өсөн келәт бар. Балаларға ла һабаҡ бирелә. Хәҙер иһә уларға спорт менән дә шөғөлләнеү мөмкинлеге асылды.
“Республиканың Грэпплинг федерацияһы махсус келәмдәр алырға аҡса бүлде, уларға ҙур рәхмәт белдерәбеҙ, – тине Дәүләкәнгә сәфәре барышында Башҡортостан мосолмандары Диниә назараты рәйесе мөфтөй Айнур Бирғәлин. – Шулай уҡ Дәүләкән районы имам-мөхтәсибе Рөстәм Исламовҡа рәхмәт: ул, тәжрибәле тренер булараҡ, балалар менән быға тиклем дә үҙе даими шөғөлләнде, ғөмүмән, уларҙы белемле, физик яҡтан да көслө итеп үҫтереүгә ҙур иғтибар бүлә”.
Рөстәм хәҙрәт Исламов әйтеүенсә, спорт залының ишектәре һәр дин һәм конфессияларҙың йәш вәкилдәре өсөн асыҡ. “Беҙ уны балалар араһында дуҫлыҡ булдырыу, йәмғиәт именлеген тотороҡло һаҡлау маҡсатында ла астыҡ. Йәш быуын бәләкәйҙән берҙәмлеккә өйрәнеп, төрлө милләттәрҙең рухи ҡиммәттәренә ихтирам менән ҡарау кәрәклеген белеп, белемле, көслө, әҙәпле булырға ынтылып үҫер тигән ышаныстабыҙ. Мәғлүм ки, спорт – ҙур тәрбиә сараһы. Илебеҙҙең именлек нигеҙе ныҡлы булһын өсөн тәү сиратта балаларыбыҙың сәләмәт тормош алып барыуы мөһим”, – тине имам-мөхтәсиб Рөстәм Исламов.
Дилбәр ИШМОРАТОВА