Изге Рамаҙан айының хозур бер кисендә Өфөнөң Туҡай урамында урынлашҡан Беренсе йәмиғ мәсетендә ауыҙ асыу мәжлесендә ҡатнашырға тура килде. Намаҙ алдынан мәсеттең имам хатибы Әхмәт хәҙрәт Әхмәров менән әңгәмәләшеп алдым.
Федоровка районының Бала Сытырман ауылынан ул. 13 йәшенән Рәми Ғарипов исемендәге 1-се республика башҡорт гимназия-интернатында уҡыған. Етеҙ, көслө ихтыярлы егет бокс буйынса 18 йәшендә үк Рәсәйҙең спорт мастеры дәрәжәһенә өлгәшкән. Дингә килеүе лә спортҡа бәйле. Ярыш алдынан ураҙалағы атаһы: “Улым, спорт менән шөғөлләнгәс, категорияға ярашлы, һиңә ауырлығыңды контролдә тоторға кәрәк. Ураҙа ярҙам итер, иншәАллаһ, ярҙамын күрерһең”, – ти. Әхмәткә ураҙа тотоу килешә, мәсеткә йөрөй башлай.
Башҡорт дәүләт университетының тарих факультетында IV курста белем алған осорҙа Рәсәй Ислам университетына ситтән тороп уҡырға инә. БДУ-ны тамамлағас, дини белем эстәр өсөн көндөҙгө бүлеккә күсә. Ике йыл Һамар ҡалаһында мәҙрәсәлә балалар уҡыта. Унан ҡайтҡас, Ислам институтында мөғәллимлек итә. Әлеге ваҡытта Шамонин биҫтәһендә мәсет төҙөү менән мәшғүл. Мосолмандарҙы, башҡорт халҡын иманлы итеүҙә, рухи тәрбиә биреүҙә дини йорттоң баһаһы оло икәненә иманы камил уның.
“Беренсе йәмиғ мәсетенә медицина, авиация университеттарынан, Башҡорт дәүләт университетынан студенттар күп йөрөй. Туғыҙ милләт вәкилдәре араһында индус, ғәрәп, афған, Африка, Урта Азия кешеләре бар, – ти имам-хатип. – Ислам дине күп милләтте берләштерә. Вәғәзде башҡортса һөйләгән саҡтарыбыҙ була, Башҡортостан тураһында ла телгә алабыҙ. Мәсеттә милләт-ара татыулыҡ хөкөм һөрә, туғанлыҡ хисе һаҡлана. Бергәләп ауыҙ асабыҙ, ифтарҙа ҡатнашабыҙ. Яҡшы мөғәмәләлә булғас, уларҙың да беҙгә күңеле асыҡ. Сит ил вәкилдәре халҡыбыҙҙы, республикабыҙҙы ихлас ярата”.
Рамаҙандың мәғәнәһе – яндырыусы. Был һәр кемгә мәғлүм. Аллаһ Тәғәлә ураҙа тотоусыларҙың гонаһтарын яндырып, юҡ итә. “Астың асыуы яман” тиһәләр ҙә, был айҙа кеше сабырлыҡҡа өйрәнә, астың хәлен аңлай, шул сәбәпле күңеле йомшара, йөрәгендә миһырбанлыҡ арта.
“Рамаҙан айында фидиә тигән әйбер бар. Ураҙа тотмаған кеше фидиә саҙаҡаһы бирһә, ураҙа тотоусыларға ауыҙ астырһа, ураҙа тотҡан сауабын ала. Рамаҙан айы аҙағында мохтаж кешеләр – 200 һум, урта хәллеләр – 400 һум, байҙар, хәллеләр 1100 һум фитыр саҙаҡаһы бирергә тейеш. Был саҙаҡа, бер яҡтан, ураҙалағы булған хата-кәмселекте Аллаһ ғәфү итһен өсөн, икенсенән, мохтаж кешеләрҙе һөйөндөрөр өсөн тапшырыла”, – ти Әхмәт Әхмәров.
Рамаҙан айындағы тәрәүих намаҙына мәсеткә 400-ләп кеше йыйыла. Улар үҙҙәре, ғаиләһе, яҡындары һәм дә тыныслыҡ өсөн доға ҡыла. Һуғышта вафат булғандар шәһит китә, йәғни Аллаһтың иң бөйөк булған дәрәжәһенә лайыҡ була. Улар рухына аят уҡыйҙар, Рәсәй өсөн, республикабыҙ өсөн доға ҡылалар. 45 минут барған тәрәүих намаҙында мосолмандар ихлас, сабыр ҡатнаша. Рамаҙан айында Ҡөрьән-хатым сығыла. Ҡөрьәнде берәү баштан алып аҙағынаса уҡый, ҡалғандар артынан ҡабатлап бара. Был – сөннәт, сөнки пәйғәмбәребеҙ ҙә Ябраил фәрештә артынан Ҡөрьән Кәримде ҡабатлап барған.
“Аллаһ Тәғәләнең ҡөҙрәте киң, – иң мөһиме – кешене рәнйетмәү, кеше менән яҡшы мөғәмәләлә булыу. Һеҙ минән һорағыҙ, мин һеҙҙе ғәфү итермен, ти Аллаһ. Әммә белә тороп кеше башҡа берәүҙең хаҡына керә икән, эш хаҡын түләмәгән икән, һуҡҡан икән, үлтергән икән, рәнйетелгән кеше рәнйеткәнде ғәфү итмәй тороп Аллаһ Тәғәлә уны ғәфү итмәйәсәк. Кеше хаҡы Аллаһ хаҡынан да бөйөгөрәк”, – кешелек үҫеше, йәшәйеш өсөн мөһим ошо төшөнсәне яҡшы аңлаған Әхмәт хәҙрәттең ғаиләһендә тәүфиҡлы, итәғәтле балалар үҫә.
Табип һөнәрле хәләл ефете лә ураҙала. Ҡыҙы менән улы, спорт менән шөғөлләнмәгән, мәктәпкә бармаған көндәрҙә ата-әсәләренә эйәреп ураҙа тота. Мәсеткә бергә йөрөйҙәр, бергәләшеп намаҙ уҡыйҙар. Изге ғөрөф-ғәҙәттең быуындан-быуынға тапшырылыуын яҡшы аңлай Әхмәровтар.
Рамаҙан айы мөбәрәк булһын. Иманлы ғаиләләр артһын, тормошобоҙҙо изге күңелле, алсаҡ, тәрбиәле кешеләр йәмләһен!
Тәнзилә ДӘҮЛӘТБИРҘИНА.