Бөтә яңылыҡтар
Иман
22 Апрель , 10:18

“Бөтә шарттар бар: беҙгә эшләргә генә кәрәк”

“Рамаҙан тирмәһе”нә ифтарға йыйылыу матур йолаға әйләнде.

dumrb.ru Ауырғазылағы ифтар мәле.
Ауырғазылағы ифтар мәле.Фото:dumrb.ru

Республикабыҙҙың төрлө төбәктәрендәге “Рамаҙан тирмәһе”ндә көн дә ифтар үткәреү дауам итә. Күптән түгел Ауырғазы районының Талбазы ауылында уҙған ошондай сарала Башҡортостан мосолмандары Диниә назараты рәйесе мөфтөй Айнур хәҙрәт Бирғәлин дә ҡатнашты.

Ифтарға шулай уҡ район хакимиәте башлығы Арыҫлан Шәһәретдинов, урындағы имамдар, ураҙа тотҡан халыҡ килде.

Мөфтөй үҙ сығышында Ра­маҙан айында изге ғәмәлдәр атҡарыу мөһимлегенә ҙур иғтибар бүлде. “Мосолман, йәмғиәткә файҙа килтереп, яҡшы эштәре менән өлгө күр­һәтеп йәшәргә тейеш. Рамаҙан айында ошондай изге ғәмәл­дәрҙең иң олоһо – мохтаждарға ярҙам итеү, – тине Айнур хәҙрәт. – Ураҙа һәммәбеҙҙе лә асығып йәшәгәндәрҙең хәлендә булырға мәжбүр итә. Тимәк, күпмелер ваҡыт уларҙың кисер­гәндәрен үҙебеҙ ҙә тоябыҙ, һөҙөмтәлә күңелебеҙҙә мәрхә­мәтлелек, шәфҡәтлелек, мох­таждарға ярҙам күрһәтеүгә ынтылыш арта.

Әл-хәмдү лил-ләһ, әле беҙ яҡшы, мул тормошта йәшәйбеҙ. Бының өсөн Аллаһ Тәғәләгә рәхмәтле булайыҡ. Изге айҙағы мөмкинлектән файҙаланып, яҡындарыбыҙ, ҡәрҙәштәребеҙ өсөн ифтарҙар үткәрәйек. Шулай уҡ мәсеттәребеҙҙе тәр­биәләп тотайыҡ, унда йәмәғәт намаҙҙарына йөрөйөк, дин дәрестәре үткәрәйек. Төрлө проекттарҙы тормошҡа ашырыу өсөн дәүләт гранттары алырға тырышайыҡ – власть мосол­мандарға төрлө яҡлап ярҙам итергә әҙер”.

Район хакимиәте башлығы Арыҫлан Шәһәретдинов иһә имамдарҙы урындағы власть органдарына әүҙем ярҙам итергә саҡырҙы. “Ауылдар халҡы һеҙгә ҙур ихтирам менән ҡарай, – тине ул. – Райо­ныбыҙҙа имамдар һүҙенә гелән ҡолаҡ һалалар. Шуға ла диндарҙарыбыҙҙың төрлө мәсьә­ләләрҙе хәл итеүҙә өлөшө баһалап бөткөһөҙ. Урындағы проекттарҙы тормошҡа ашы­рыуҙа ла әүҙем булышлыҡ ҡылһағыҙ ине. Бигерәк тә ба­лаларҙы, йәштәрҙе тәрбиәләүгә йүнәлтелгән башланғыстарҙа ярҙам кәрәк. Киләсәк быуындың ниндәй булыры беҙҙең бөгөнгө эшебеҙгә бәйле”.

Ғөмүмән, ике йыл буйы ғәмәлгә ашырылған “Рамаҙан тирмәһе” проекты Башҡортос­тан мосолмандары Диниә назаратының изге йолаһына әйләнде тиерлек. Мөфтөй Ишембай ҡалаһында ла ошондай уҡ сарала ҡатнашты. Әйтеүенсә, ундағы “Рамаҙан тирмәһе” өлгөлө майҙансыҡ­тарҙың береһе булып тора. Ифтарға көн дә кеше күп йыйыла. “Бында Ишембай ҡалаһы хакимиәте башлығы Илшат Шакировтың, урындағы имам-мөхтәсиб Илшат хәҙрәт Ха­физовтың өлөшө ҙур”, – тип билдәләне Айнур хәҙрәт.

Балтас районының Иҫке Балтас ауылында үткән ошондай сара алдынан иһә мөф­төйгә Ғабдулла Ғәлиев (Батырша) музейын күрһәттеләр. Экскурсияла хакимиәт башлығы Илгиз Субушев та ҡатнашты. Музейҙы булдырған һәм уға етәкселек иткән имам-мөхтәсиб Рәфис хәҙрәт Шәйхәрҙәнов эшмәкәрлек тураһында һөйлә­не, артабанғы ниәттәре менән уртаҡлашты.

“Рамаҙан тирмәһе”ндәге ифтарҙа мөфтөй Балтаста элек-электән диндең көслө булғанын, әле лә халыҡтың ошо хаҡ юлды лайыҡлы дауам итеүен билдәләне. Шулай уҡ Рәсәйҙәге Ислам мәҙәниәтенә, фәненә һәм мәғарифына ярҙам фондының илдәге мосолман берләшмәләрен үҫтереүгә йүнәлтелгән проекттарға ҙур ярҙам күрһәтеүе хаҡында бәйән итеп, уның программаларында әүҙемерәк ҡатнашырға саҡыр­ҙы. “Беҙҙең өсөн бөтә шарттар булдырылған – бергәләп эш­ләр­гә генә ҡала”, – тине мөф­төй.

Билдәле булыуынса, ифтар ҡылдырыу – иң изге ғәмәлдәр­ҙең береһе. “Бындай йомарт­лыҡ күрһәткән кешегә Аллаһ Тәғәлә сират күперен үтеүҙе еңеләйтер”, – тиелә хәҙистә. Шулай уҡ “Әгәр ҙә ки кемдер ураҙа тотоусынан ауыҙ астыр­һа, уны фәрештәләр Рамаҙан айы буйы данлар, Ябраил ғәләйһис-сәләм Ҡәҙер кисендә сәләмләп ҡаршы алыр”, – тип әйтелә динебеҙҙә. Тимәк, республикабыҙҙа тормошҡа ашырылған “Рамаҙан тирмәһе” проектының әһәмиәте баһалап бөткөһөҙ.

Дилбәр ИШМОРАТОВА

Балтастағы “Рамаҙан тирмәһе”ндә.
Балтастағы “Рамаҙан тирмәһе”ндә.
Читайте нас в