Ишбирҙеләр ҡорбан салған

Баймаҡ районының Ишбирҙе ауылы ҡатын-ҡыҙҙары бергәләшеп аҡса йыйып, ил һаҡларға киткән ир-егеттәр өсөн ҡорбан салған.

Был хаҡта урындағы клуб төркөмөндә хәбәр ителә. Баймаҡ районының Ишбирҙе ауылы ҡатын-ҡыҙҙары кәңәшләшеп, аҡса йыйып, ил һаҡларға киткән ир-егеттәр иҫән-һау әйләнеп ҡайтһын, донъялар тыныс булһын, тип ҡорбан салдырып, ауыл мәсетендә ҡорбан ашы ашатҡан. Өлөшләтә мобилизацияға эләккәндәрҙең ата-әсәләре сараға дәррәү килгән. Йыйылған аҡсаның бер өлөшөнә хәрби хеҙмәттәгеләргә Яңы йыл күстәнәсен хәстәрләргә, йөн ойоҡбаштар бәйләп ебәрергә ҡарар иткәндәр. Дин әһелдәре аят-доғалар уҡып, оло йәштәге абруйлы ағайҙар изге теләктәрен еткергән.

Салған ҡорбандар ҡабул булып, ир-егеттәребеҙ иҫән-һау тыуған йорттарына әйләнеп ҡайтһын, Аллаһ бирһә. Илебеҙ тыныс, күгебеҙ аяҙ, донъяларыбыҙ имен, күңелдәребеҙ тыныс булһын, илебеҙгә янаған афәт, ҡурҡыныс мәхшәр тиҙерәк бөтһөн! Афарин ишбирҙеләр!

Фото Ишбирҙе ауылы клубы төркөмөнән.