Ут эсендә доға көсөнә таянып...

...М. Шайморатов исемендәге башҡорт батальоны яугирҙәренең Угледарға һөжүмгә барыуы йома көнөнә тап килә. Унан алда ғына ҡорбан салған булалар. Һөжүм алдынан полк имамы Хәмзә хәҙрәт Хафизов егеттәребеҙҙе йыйып ала. “Беҙҙең алда ауыр һынау тора. Унан кемегеҙ иҫән ҡайта, ә кемегеҙ юҡ – быны Аллаһ Тәғәлә генә белә. Раббыбыҙҙан именлек һорап, Уның ризалығы өсөн намаҙ уҡыйыҡ, егеттәр”, – ти ул. Шулай эшләйҙәр ҙә.

Ә был ваҡытта – ҡыш, сатлама һыуыҡ. Яугирҙәребеҙ, терһәккә ҡәҙәр ҡар менән генә таҙарынып, бит-муйынын сылатып һөртөп, намаҙ уҡырға йыйыла. Беләләрме, юҡ­мы – барыһы ла аяғүрә баҫып тора. Аллаһ Тәғәләнең мәрхәмәте­нә, яҡларына ышаныс ҡиблаға ҡаратып ҡуя уларҙы. Рухи остаздары – һәр саҡ яндарында булған Хәмзә хәҙрәттең артынан намаҙ хәрәкәттәрен ҡабат­лап, Аллаһҡа ялбаралар, сәждә ҡы­ла­лар... “Ғә­мәл­де ихлас күңел­дән башҡарырға кәрәк, – тип өйрәтә уларҙы остаздары. – Йөрәктән сыҡ­ҡан теләк-үтенес кенә Раббыбыҙға барып етер”.

Бына шулай ҙур эш алып бара Хәмзә хәҙрәт Хафизов яҡташ яугир­ҙәребеҙ араһында. Күптән түгел махсус хәрби операция биләмә­һендә сәфәрҙә булғанда быға ныҡ­лы инандыҡ. Диндар гелән һалдат­тар янында, уларҙың рух һағында.

“Махсус хәрби операция башланыу менән Юғары мөфтөй Тәлғәт хәҙрәт Тажетдингә киттем. “Мин – имам. Бындай мәл­дә өйҙә ултыра алмайым, йөрәгем ҡушмай, – тим. – Ебәрегеҙ мине яуға – һалдаттар янында булырға тейешмен”. Һәм шул саҡтағы ҡырҡа ҡарарыма бөгөн һис тә үкенмәйем. Бында үҙемде, ысынлап та, үҙ урынымда кеүек тоям”.

Хәмзә хәҙрәт яугирҙәргә һәр осраҡта ла Аллаһ Тәғәләгә яҡын бу­лырға ынтылыу кәрәклеген тө­шөндөрә. “Әҙәм балаһының бөгөн ҡыуаныуы, ә иртәгә ҡайғы-хәсрәткә батыуы ихтимал. Раббыбыҙ беҙгә төрлө һынауҙарын ебәреп кенә тора. Ауырлыҡтарҙы ҡайһы берәү­ҙәр күтәрә алмай, һынып та ҡуйыу­сан, – ти хәҙрәт. – Яугирҙәребеҙгә килгәндә, яңы ғына улар тыныс тормошта йәшәй ине, бөгөн иһә – ут эсендә. Бында сәғәт кенә түгел, хатта секунд һайын үлем көтөүе ихтимал. Бөгөн барһың, иртәгә юҡ­һың. Ошондай хәүеф, ауыр һынау эсендә һәр кем күңел таянысы эҙләй. Ә был терәк – тик Аллаһ Тәғәлә. Ул һине һаҡлай икән, снаряд яуып торһа ла, имен ҡала­саҡ­һың, иншаллаһ. Әгәр инде Раббы­быҙға яҡынламайһың, доға ҡыл­май­һың икән, һин – һаҡлаусыһыҙ. Шуға ла яугирҙәребеҙгә, дингә килегеҙ, доғалар ятлағыҙ, намаҙға баҫығыҙ, тим һәр вәғәземдә. Әйткәндәремде ишетәләр, хаҡ юлға ыңғайлайҙар, әлхәмдү лил-ләһ”.

Ә вәғәздәрҙе Хәмзә хәҙрәт Башҡортостан егеттәре булған һәр яу урынында даими һөйләп, төрлө һорауҙар менән мөрәжәғәт иткән­дәргә яуап биреп, күңелдәрен тынысландырып, рухландырып йөрөй – диндарлыҡ бурысын бөтөн күңелен һалып атҡара. Ул алып барған тәрбиәүи эштең ни тиклем йоғонтоло, әһәмиәтле икәненә яҡташ яугирҙәребеҙ менән һөйләш­кәндә ныҡлы инандыҡ. “Көнсы­ғыш­тан беҙгә яуыз уйҙар менән баҫым яһайҙар икән, мылтыҡ тоҫҡа­ма­йынса булмай, – ти егеттәр. – Ал­лаһ Тәғәлә ҡушҡандарға бөтөнләй ҡаршы барған, шайтан ҡотҡоһона бирелеп, донъяла баш етмәҫлек тәртип-ҡағиҙәләр урын­лаш­тырырға тырышҡан, мәҫәлән, бер енесле никахтар булдырыу мәсхәрәһен күрһәткән дошмандың юлын быу­мау – үҙе үк ҙур гонаһ ул”.

Был йәһәттән Хәмзә хәҙрәттең һүҙе бер: Көнсығыш илдәр юл һал­ған ҡот осҡос афәткә ҡаршы көрәш­мәү мөмкин түгел, ти ул. “Ватанды һөйөү – имандың бер өлөшө, тиелә динебеҙҙә. Тыуған илебеҙҙе, ере­беҙҙе һәр яҡлап һаҡларға тейеш­беҙ, – ти имам. – Көнбайыштан нин­дәй өлгө алырға мөмкин?! Ал­лаһ Тәғәлә ҡушҡанса, ирле-ҡатын­лы ғаиләлә балаларына дөрөҫ тәрбиә биреп үҫтермәгәс, киләсәк­тәре ниндәй булыр? Ә улар үҙҙә­рен­дәге хәшәрәтлекте, Раббыбыҙ ҡушҡандарға ҡаршы тәртиптәрҙе беҙгә лә индерергә маташа. Быға юл ҡуймау, тимәк, Ватаныбыҙҙы, тамырҙарыбыҙҙы һаҡлау – имандың бер өлөшө”.

Билдәле булыуынса, Хәмзә хәҙ­рәт быйылғы Ҡорбан байрамы алдынан республикаға яугирҙәре­беҙгә ҡорбанлыҡ малдары ебәреү­ҙе һорап мөрәжәғәт иткәйне. “Һө­ҙөмтәлә Юғары мөфтөй Тәлғәт Тажетдиндең ярҙамы менән махсус хәрби операция биләмәһендәге егеттәре­беҙгә 15 баш һарыҡ килтереп еткерелде. Уларҙы яугирҙә­ребеҙ хеҙмәт иткән һәр урында аша­тырға ниәт ҡылғанбыҙ. Ебәрел­гән ҡорбанлыҡтар өсөн ҙур рәхмәт белдерәбеҙ, изгелегегеҙгә Аллаһ Тәғәлә сауаптарын насип итһен. Ғөмүмән, республикабыҙ һәр саҡ бар яҡлап ярҙам итеп тора. Ошолай берҙәм булғанда, һис шикһеҙ, еңәсәкбеҙ!” – ти Хәмзә хәҙрәт.

Ул – хаж ҡылған кеше. Һөйлә­үенсә, 2008 йылда мәҙрәсәгә уҡыр­ға ингәс, тәүге сессияһы хаж ҡылыу мәленә тура килә. Нимә эшләргә бел­мәйенсә аптырап ҡалғас, уҡы­тыусыһы: “Исламдың биш терә­генең береһе булған хаж ғәмәлен ҡалдырма, бар, – ти. – Сессияны иһә, иншаллаһ, ҡайтҡас та тапшырып ҡуйырһың”. Шулай итеп, изге сәфәргә юллана яҡташыбыҙ. “Унан утыҙ литрҙан ашыу зәм-зәм һыуы, шулай уҡ үҙем бейеклектәге айҙы күтәреп ҡайттым, – ти ул. – Ун биш йыл үтһә лә, зәм-зәм һыуы һа­ман да бөтмәй әле, иҫкермәй һаҡ­лана, шифаһы иһә баһалап бөткөһөҙ”. Ә айҙы Хәмзә хәҙрәт Баймаҡ районының Мерәҫ ауылында төҙөргә ниәтләгән мәсет өсөн ала. Был маҡсатына ун йыл элек тотоноп, махсус хәрби операция башланғанға тиклем байтаҡ эш атҡарып өлгөрә. “М. Шайморатов исемендәге батальон яугирҙәре менән бергә яуға юлланыр алдынан республика Башлығы Радий Хәбиров, барыбыҙҙы йыйып алып: “Кемегеҙҙең ниндәй башҡарыл­маған эше ҡалды?” – тип һорап ҡуйҙы. Миңә сират еткәс, йөрәгем­де өйкәп торған мәсьәләне әйттем. “Ун йыл буйы Баймаҡ районының Мерәҫ ауылында мәсет төҙөйөм, ошо эште һаман аҙағына еткереп булмай”, – тинем. “Хәҙрәт, тыныс күңел менән барығыҙ, ә беҙ һеҙҙең мәсьәләне хәл итербеҙ”, – тине Радий Фәрит улы. Һәм һүҙендә торҙо: әлхәмдү лил-ләһ, мәсет төҙөлөшө дауам итә”, – тип республика Башлығына ҙур рәхмәт әйтте дини остаз.

...Ут эсендә Аллаһ ярҙамына өмөт итеп алға бара егеттәребеҙ. Иман юлына килгәндәрҙең сафы артҡандан-арта. “Дингә күркәм һүҙ, үҙеңдең өлгөлө ғәмәлдәрең менән саҡыр” – Пәйғәмбәребеҙҙең ошо аманатын тотоп эш иткән Хәмзә хәҙрәттең күңелдәргә сәскән өмөт-ышаныс, иман емештәре киң таралып, ғүмерҙәрҙе һаҡлаһын, тыныслыҡҡа юл ярһын, иншаллаһ!

- Вәдүт ИСХАҠОВ