Юл тиҙ арала ремонтлана

Социаль селтәрҙәрҙәге автоматлаштырылған “Инцидент менеджмент” мөрәжәғәттәр системаһы Белорет районынан Полина Баҡыеваның мөрәжәғәтен теркәгән.

Белорет районы Сосновка ауылы йүнәлешендәге юлдың торошона борсолоуын белдерә ул.

“Сосновка ауылы йүнәлешендәге юлдың ике урынында асфальт ҡубып сыҡҡан. Юлда йөрөүселәр өсөн бик хәүефле. Зинһар ярҙам итегеҙ”, - тип яҙа ул.

Күп тә үтмәй Белорет районы  хакимиәтенән шундай яуап килә:

“Хәйерле көн. Белорет юл ремон-төҙөлөш идаралығы – “Башкиравтодор” филиалы баш инженеры Евгений Никитин асфальт ҡатламы ҡубып сыҡҡан урындарҙа юлдың ипкә килтерелеүе тураһында хәбәр итте”.

Мәғлүм булыуынса, “Инцидент-менеджмент” системаһы – Башҡортостанда күптән түгел эшләй башлаған Республика менән идара итеү үҙәгенең бер өлөшө. Ул төбәк халҡының көндәлек һорауҙарын асыҡлап, килеп тыуған мәсьәләләрҙе хәл итеүҙә ярҙамлаша.

Фото: "Инцидент-менеджмент".