Балалар майҙансығы өсөн кем яуаплы?

“Мәләүез ҡалаһының Балалар ижады йорто эргәһендәге паркта балалар майҙансығы бар. Бөгөн балам шул майҙансыҡта уйнап йәрәхәтләнде. Шыуып төшөр өсөн ҡуйылған тауҙың ағас баҫҡыстары һурып алынған. Кем был майҙансыҡ өсөн яуаплы?” – тип яҙа социаль селтәрҙәге автоматлаштырылған “Инцидент-менеджмент” мөрәжәғәттәр системаһына Татьяна Щерба.

Мәләүез районы хакимиәте башлығы Рөстәм Шәмсетдинов билдәләүенсә, мөрәжәғәт теркәлеү менән әлеге майҙансыҡты уратып алғандар. Ә 22 июлдә бөтөн етешһеҙлектәр ҙә төҙәтелгән, һурып алынған таҡталар яңынан һалынған. Әле майҙансыҡ балалар уйыны өсөн хәүефле түгел.

Мәғлүм булыуынса, “Инцидент-менеджмент” системаһы – Башҡортостанда күптән түгел эшләй башлаған Республика менән идара итеү үҙәгенең бер өлөшө. Ул төбәк халҡының көндәлек һорауҙарын асыҡлап, килеп тыуған мәсьәләләрҙе хәл итеүҙә ярҙамлаша.

Фото: "Инцидент-менеджмент".