Юл ситенән тау шыуғанда...

Бәләбәй ҡалаһынан Лилиә Иванова социаль селтәрҙәге автоматлаштырылған “Инцидент-менеджмент” мөрәжәғәттәр системаһы аша  ҡала хакимиәтенә хәбәр ебәргән. Садовая урамы буйындағы юл сите хәүефләндергән уны.

Ҡарҙың күплеге арҡаһында был урынды күптән көрт баҫҡан. Ҡар ҡойма бейеклек булған. Ошо урынға бала-саға килеп һырғалаҡ шыуа икән. Оло йәштәге ханым әлеге урынға ҡом һибергә тәҡдим итә. Шул осраҡта балалар шыуыуҙан туҡтар ине, ти.

Ҡала хакимиәте башлығы Сәлим Ғөбәйев белдереүенсә, коммуналь хужалыҡ хеҙмәткәрҙәре ошо көндәрҙә әлеге һырғалаҡты трактор ярҙамында таратҡан, ҡом һәм тоҙ ҡушылмаһы һипкән. Яҙғы ҡояш был ерҙе тиҙ иретер тип ышана улар. Тимәк, балалар тау шыуып, ҡапыл юлға килеп сығыр тип ҡурҡырға кәрәкмәй.

Фото һәм сығанаҡ:"Инцидент-менеджмент".