Тағы туҡталыштың быялаһын ярып киткәндәр ине...

Октябрьский ҡалаһынан Елена социаль селтәрҙә ҡалалағы туҡталыштарҙың һәм сүп-сар йәшниктәренең торошо тураһында хәбәр ҡалдырған.

“Наполеон” комплексы янында тағы ла туҡталыштың быялаһын ярып киткәндәр. Шулай уҡ 35-се биҫтәләге 15-се, 15-се а йорттары янындағы сүп-сар йәшниктәре тураһында ла хәбәр итергә теләйем. Төбө серей башлаған, тутыҡҡан сүп-сар һауыттары балалар майҙансығында тора. Әлбиттә, барлыҡ сүп-сар ергә төшә, тирә-йүнгә таралып, туҙып ята”, - тип яҙа Елена.

Был мәғлүмәт “Инцидент-менеджмент” системаһы тарафынан иғтибарға алынғас, әлеге мәсьәләне хәл итеү Октябрьский ҡалаһы хакимиәтенә йөкмәтелә.

Туҡталыштың торошона бәйле түбәндәге яуап алынған: “2022 йылдың 31 майына ҡарата “Наполеон” күңел асыу комплексы янындағы туҡталыштың быялаһы алмаштырылды. Әгәр һорауҙарығыҙ ҡалһа, ҡала хакимиәтенең стратегик үҫеш, юл хужалығы һәм транспорт бүлегенә шылтыратырға мөмкин: 4-23-03. Битараф булмауығыҙ өсөн рәхмәт!”

Инде ихатаның һәм сүп-сар йәшниктәренең торошона килгәндә, түбәндәге яуап алынған: “Биләмәне “Торлаҡ идаралығы” йәмғиәте хеҙмәтләндерә һәм таҙалыҡ торошон иғтибар үҙәгендә тота. Йәмғиәттең баш инженеры В.А. Озеров хәбәр итеүенсә, ихаталағы сүп-сар йыйылған, эскәмйәләр янындағы сүп-сар йәшниктәре алынған. Улар ысынлап та артабан ҡулланыу өсөн яраҡһыҙ, тип билдәләнгән. Яңы сүп-сар йәшниктәре ҡуйыу мәсьәләһен был биләмәлә йәшәүселәр үҙҙәренең дөйөм йыйылышында ҡарап, ҡарар сығара һәм “Торлаҡ идаралығы” йәмғиәте менән эштәрҙең хаҡы, башҡарыу ваҡыты тураһында килешә ала”.

Күреүегеҙсә, йәшәгән еренең, ҡала-ауылының торошона, таҙалығына битараф булмаған кешеләр күп арабыҙҙа. Еленаның мөрәжәғәте һәм “Инцидент-менеджмент” системаһының көйлө эшләүе һөҙөмтәһендә ике мәсьәлә лә ыңғай хәл ителгән.

Фото: “Инцидент-менеджмент” системаһы.