Эстә өс ауырлы ҡатын булған...

Транспорт салонында өс ауырлы ҡатын китеп барғанын да иҫәпкә алһаҡ, был хәлдең ниндәй аяныслы булғанлығын күҙ алдына килтерәһегеҙҙер.

“На земле Салавата” баҫмаһы хәбәр итеүенсә, юл-транспорт ваҡиғаһы Кропачев-Мәсәғүт юлында теркәлгән. Өс ауырлы ҡатынды акушер оҙатыуында Мәсәғүт үҙәк район дауаханаһына тикшерелергә алып китеп барғандар. Ахун ауылы янынан үтеп барғанда шофер идараны юғалтҡан, һәм машина трассанан ситкә сығып, ҡабырғаһына ауған.

Юл-транспорт ваҡиғаһы урынына икенсе “Ашығыс ярҙам” машинаһын саҡырғандар. Әммә ул килеп етеүгә ауырлы ҡатын-ҡыҙҙар һәм акушер урында булмаған – юл ыңғайындағы автомобилдәр зыян күргәндәрҙе Мәсәғүткә алып китеп өлгөргән.

Был аяныслы хәлдең ҡорбанһыҙ тамамланыуы – үҙе бер мөғжизә. Шундай стресс кисергән ҡатын-ҡыҙға һаулыҡ, бәпестәрен имен-аман табып алыуын теләйбеҙ.

Фото: na-zemle-salavata.rbsmi.ru