Юғалған бала табылған!

23 сентябрҙә Өфөлә ун йәшлек Даниил Чернявскийҙың юғалыуын хәбәр иткәйнек инде. Көндөҙгө сәғәт икеләр тирәһендә өйҙән сығып киткән малай ҡайтмаған, телефон бәйләнеше лә юҡ, тип ата-әсәһе бик ҡайғырып, полицияны аяҡҡа баҫтырғайны.

Даниилдың яҡындары ярҙам һорап, “Поиск детей-Уфа” ирекмәндәренә лә мөрәжәғәт иткән. Даниилды күргән кешеләр булһа, зинһар, полицияға йәки ирекмәндәргә шылтыратығыҙ, тип телефон номерын да биргәйнеләр.

"Лиза Алерт" ирекмәндәре лә баланы эҙләүгә әүҙем ҡушылды. Тырышлыҡ бушҡа китмәне - бөгөн иртәнсәк малайҙың имен-аман табылыуы тураһында шатлыҡлы хәбәр килде. Асыҡланыуынса, Даниил ҡала буйлап көнө буйы йөрөгән, уны Салауат Юлаев проспектында тапҡандар. Әле малайҙың ни өсөн өйҙән китеү сәбәптәре асыҡлана, тип хәбәр иттеләр полицияла.

Фото: шәхси архивтан.