+21 °С
Болотло
Хәүефһеҙлек
29 Апрель 2021, 14:30
Ташҡын хәүефе бар әле
Бындай походтарға сыҡҡандар хәүефһеҙлек сараларын алдан күрергә тейеш. Берәй хәл килеп тыуған осраҡта...
Бөгөн республикала ташҡын һәм янғын торошо буйынса уҙғарылған онлайн-брифингта Рәсәй Ғәҙәттән тыш хәлдәр министрлығының Башҡортостан буйынса Баш идаралығы начальнигының беренсе урынбаҫары Эдуард Иҙрисов белдереүенсә, әле өс райондағы 16 хәл күҙәтеү аҫтында ҡала, йәғни 432 ихата һәм баҡса.
Шишмә һәм Өфө райондарында Дим йылғаһы тулыһынса ярына ҡайтып бөтмәгән, әммә көн һайын кимәле кәмей, тине Башҡортостандың Ғәҙәттән тыш хәлдәр буйынса дәүләт комитеты рәйесенең беренсе урынбаҫары Кирилл Первов.
Ташҡын ваҡытында бөтәһе 30 юл участкаһын һыу баҫҡан, шул сәбәпле 11 участкала юлдарҙы ябып торғандар. 26 апрелдә Белорет районында һуңғы юл участкаһы асылған, йәғни әле автомобилдәр хәрәкәте өсөн тотҡарлыҡтар юҡ.
Брифингта апрель аҙағында һәм майҙа тау йылғаларында ағыусылар артыуына бәйле хәүефһеҙлек саралары күреү мәсьәләһе лә ҡаралды. Ун көндә маршруттарҙан өс-дүрт мең кеше самаһы үтә. Шуға күрә лә Оло һәм Кесе Инйәр, Еҙем, Ләмәҙ, Һаҡмар кеүек тау йылғаларында ҡотҡарыусылар постары ҡуйыла, тине Кирилл Первов.
Бындай походтарға сыҡҡандар хәүефһеҙлек сараларын алдан күрергә тейеш. Тәү сиратта республиканың Ғәҙәттән тыш хәлдәр буйынса дәүләт комитеты сайтында – https://02.mchs.gov.ru/ теркәлергә, берәй хәл килеп тыуған осраҡта, шунда уҡ ҡотҡарыусыларға – 112 телефонына шылтыратырға кәрәк.
Фото: karoaltai.ru
