Урмандарҙы һауанан күҙәтеү дауам итә

Башҡортостандың Урман хужалығы министрлығынан хәбәр итеүҙәренсә, республикала юғары янғын хәүефе тороуы сәбәпле, бөгөн урман фондында авиация патруллек итеүе ойошторола.

– Бөгөн авиация күҙәтеүе республиканың көньяҡ-көнсығышындағы урман янғындары күпселек тәшкил иткән, үтеүе ауыр булған таулы урындарҙа осасаҡ. Һауа күҙәтеүе Бөрйән, Йылайыр, Ейәнсура, Хәйбулла райондары биләмәләрендә барған янғындарға  юлды дөрөҫ күрһәтеүгә булышлыҡ итә, – тип хәбәр итте Урман янғыны үҙәгенең летчик-күҙәтеүсеһе Урал Риянов.

Летчик-күҙәтеүсе билдәләүенсә, авиапатруллек итеү урман янғындарын һүндереүҙе һәм бөтөрөү буйынса сараларҙы һөҙөмтәлерәк ойоштороуға булышлыҡ итә. Урмандарҙы һауанан күҙәтеү буйынса эш алдағы көндәрҙә лә дауам итәсәк.  

Иҫкәртәбеҙ: әле республикала көндәр ҡоро һәм эҫе тора, был иһә бер шырпының да ҙур янғынға сәбәпсе булыуына булышлыҡ итә. Шуға ла хәүефһеҙлек тураһында онотмайыҡ!

Урман янғынын күрһәгеҙ, Урман һағының берҙәм бушлай – 8 (800) 100-94-00 йәки БР Урман хужалығы министрлығының төбәк диспетчер хеҙмәтенә 8 (347) 218-14-14 шылтыратығыҙ.

Фото: БР Урман хужалығы министрлығынан.