Бар көс утты һүндереүгә йүнәлтелгән

Алдан хәбәр итеүебеҙсә, Ейәнсура районының Казанка ауылынан дүрт саҡрым алыҫлыҡта тоҡанған ут, һөрөлгән һыҙаттан аша сығып, Биштирәк һәм Ағурҙа ауылдарына хәүеф тыуҙырғайны. Район халҡы, янғын һүндереүселәр көнө буйы ут менән көрәшеп, уны туҡтатыуға өлгәште.

Әммә әле тынысланырға иртәрәк. Төндә лә дежур төркөмдәр эшләне. Таңғы биштән йәнә янғын менән көрәш башланған. Әле утты һүндереүҙә бөтәһе 15 берәмек техника ҡатнаша, Күмертауҙан ярҙамға килгән аэромобиль төркөм эшләй. Шулай уҡ Иҫәнғолдан ике автобус менән ирекмәндәр юлға сыҡҡан. Күршеләренә ярҙамға Йылайыр һәм Хәйбулла ирекмәндәре лә ашыға.

Район хакимиәте башлығы Дәмин Юланов белдереүенсә, бөгөн ут менән көрәштә бөтәһе 200-ҙән ашыу кеше ҡатнашасаҡ, техника етәрлек. Янғынды бөгөн туҡтатыу планлаштырыла.

Казанка ауылы мәктәбендә ирекмәндәр штабы булдырылған, урман янғындарында ярҙам итергә теләүселәргә түбәндәге телефон номерҙары аша бәйләнешкә инергә мөмкин.

Фото: "Зианчуринские зори".