Үлтерелгән ҡыҙҙарҙың кәүҙәһен тыуған яғына алып ҡайттылар...

30 сентябрь төнөндә Ырымбурҙа Башҡортостан ҡыҙҙары вәхшиҙәрсә үлтерелде. Мәғлүм булыуынса, уларҙың икәүһе - Баймаҡ, береһе Күгәрсен районынан.

17-19 йәшлек ҡыҙҙарҙың фажиғәһе инде нисәнсе көн халыҡты тетрәнеү хәлендә тота. Йәштәр Ырымбур өлкәһенең Гай ҡалаһындағы медицина колледжында уҡыған.

Ошоға тиклем мәйеттәргә суд-медицина тикшеренеүҙәре үткәрелде. Һәм бына бөгөн билдәле булыуынса, ҡыҙҙарҙың кәүҙәләрен ата-әсәләренә биргәндәр. Был турала Инстаграмдағы сәхифәһендә Ырымбур өлкәһендәге Балалар хоҡуҡтары буйынса вәкил Анжелика Линькова хәбәр итте.

"Үлтерелгән ҡыҙҙарҙың кәүҙәләрен бөгөн туғандары алды. Был процедура ваҡытында улар менән психологтар эшләне", – тип яҙҙы ул.

Ике ҡыҙыҡай Баймаҡтан, тигәйнек. Уларҙың ата-әсәһе менән бергә был райондың хакимиәт башлығы ла килгән, гел яндарында булған.

Бөгөн ҡыҙҙарҙы тыуған ауылдарында ерләрҙәр тип көтөлә. Ауыр тупраҡтары еңел, йәндәре йәннәттә булһын!.. Ата-әсәләренең әйтеп аңлата алмаҫлыҡ ҙур ҡайғыһын уртаҡлашабыҙ.

Фото: "Бәйләнештә".