Ҡытайҙа пассажир самолеты ҡолаған

Ҡытай тарафынан ауыр яңылыҡ килде. Унда China Eastern Airlines авиакомпанияһының Boeing 737 пассажир самолеты ҡолаған.

Авиаавария Ҡытайҙың Гуанси-Чжуан автономиялы районының Учжоу ҡала округында Тэн ҡалаһы янында булған. Самолет ағастар өҫтөнә ҡолаған һәм был урында урман яна башлаған.

Билдәле булыуынса, самолетта 133 кеше булған. Әлегә уларҙың яҙмышы билдәле түгел. Урында эҙләү-ҡотҡарыу операцияһы алып барыла.

Рәсәйҙең Гуанчжоуҙағы генераль консуллығынан хәбәр итеүҙәренсә, һәләкәткә тарыған самолетта Рәсәй граждандары булмаған.

Фото: rf-smi.ru