Биш үҫмер иҫһеҙ табылған

Өфөнөң Сипайлово биҫтәһенең күп ҡатлы йорттарының бер фатирында аңын юғалтҡан 14-15 йәшлек биш үҫмерҙе тапҡандар. Билдәле булыуынса, ҡыҙҙар һәм бер малай илерткес  дарыу ашаған, иҫерткес эсемлектәр ҡулланған. Уларҙың барыһын да ауыр хәлдә дауаханаға алып киткәндәр.

Әлеге ваҡытта ике бала - Ашығыс медицина ярҙамы дауаханаһында аңын юғалтҡан хәлдә реанимация бүлегендә, 17-се ҡала клиник дауаханаһында - бер бала реанимацияла, ул да аңын юғалтҡан, тағы икәүһенең хәле уртаса ауырлыҡта.

Уларҙы был аҙымға нимә этәргән? Каникулда нимә менән шөғөлләнергә белмәй, шундай аҙымға барғандармы, ата-әсәләре ҡайҙа булған? Ошо һорауҙарға яуапты улар аңдарына килгәс, бирер тигән ышаныста табиптар. Ваҡиға буйынса тикшереү эше башланған.

Их, балалар... Ә бит хәлдең насар тамамланыуы ла ихтимал ине...

Ата-әсәләрҙе йәнә бер тапҡыр иҫкәртәбеҙ: балаларығыҙҙың кемдәр менән дуҫлашыуына иғтибарлы булығыҙ, һәр саҡ телефондан шылтыратып булһа ла хәлдәрен белегеҙ. Аҙаҡ үкенергә тура килмәһен!

Фото: "Башинформ".