Рәсәй Ғәҙәттән тыш хәлдәр министрлығының Башҡортостан буйынса баш идаралығынан белдереүҙәренсә, кисә Салауат районында баҫыуҙа иген тейәлгән "КамАЗ" автомобиленә ут тоҡаныуы тураһында хәбәр алына.
Ваҡиға урынына Рәсәй Ғәҙәттән тыш хәлдәр министрлығы көстәре, Миәшәгәр ауыл биләмәһенең ирекле янғын һүндереү командаһы һәм «Үҙәк» МТС-ы дәүләт унитар ауыл хужалығы предприятиеһынан вәкилдәр ебәрелә. Улар Һарғамыш ауылынан 10 саҡрым алыҫлыҡта ике гектар майҙанда төпрә ҡалдыҡтарының һәм арбаһына иген тейәлгән "КамАЗ" автомобиленең яныуын асыҡлай.
Янғынды ике сәғәттән аҙыраҡ ваҡытта һүндергәндәр, артабан ут таралмаған. Бәхеткә күрә, бер кем дә зыян күрмәгән. Белгестәр ғәҙәттән тыш хәл сәбәптәрен асыҡлай. Янғынды Рәсәй Ғәҙәттән тыш хәлдәр министрлығы тәүтикшереүсеһе тикшерә.
Ут менән һаҡ булығыҙ!
Фото: "Башинформ".