Машина хужаһының ҡулы янған

Рәсәй Ғәҙәттән тыш хәлдәр министрлығының Башҡортостан буйынса Баш идаралығынан хәбәр итеүҙәренсә, 22 ноябрҙә Белорет ҡалаһының Май урамында “Great Wall Hover” автомобиле янған.

Утты үҙаллы һүндергән саҡта машина хужаһының – 1980 йылғы ирҙең ҡулы янған.

Рәсәй Ғәҙәттән тыш хәлдәр министрлығының тәүтикшереүселәре асыҡлауынса, машина тәүҙә гаражда торған.

Ир, капотты асып, двигателде ҡараған һәм ремонтлаған, яҡтыраҡ булһын тип, моторҙың яғыулыҡ системаһы өҫтөнә күсмә лампа элеп ҡуйған. Ял итәм тип ситкә киткән саҡта, аяғына лампаның сымы эләгә һәм ул төшөп ярыла, бензин ҡапыл тоҡанып китә. Ир янғынды үҙаллы һүндерә алмағас, гараждан машинаны этеп сығара. Ярҙамға килгән янғын һүндереүселәр автомобилдәге утты һүндерә. Гараж зыян күрмәгән. Утта зыян күргән хужаға медицина ярҙамын күрһәткәс, амбулатор дауаланыу тәғәйенләгәндәр.

Фото: @mchsrb.