Әле юлдарҙа хәл үтә ҡатмарлы

Уҙған тәүлектә республика юлдарында ун автомобиль аварияһы теркәлгән, уларҙа берәү һәләк булған, ун алты кеше йәрәхәтләнгән.

17 декабрҙә Иглин районында көндөҙгө сәғәт 11-ҙә Һамар – Өфө – Силәбе трассаһының 1536-сы километрында 49 йәшлек водитель идара иткән “Toyota Corolla Fielder” һәм 36 йәшлек ир идара иткән "Volvo" йөк машинаһы бәрелешә. Юл-транспорт ваҡиғаһы һөҙөмтәһендә еңел автомобиль водителе алған йәрәхәттәрҙән һәләк була.

– Республиканың күп райондарында һауа торошоноң насарайыуына бәйле хәл ҡатмарлы – ҡар ҡатыш ямғыр, боҙлауыҡ, һепертмә буран. Шуға ла төбәк юлдарына өҫтәмә юл патруле хеҙмәткәрҙәрен йәлеп итеү буйынса ҡарар сығарҙым. Дәүләт автоинспекцияһының үҙәк аппарат составынан төҙөлгән юл патруле экипаждары юл-транспорт ваҡиғаһы булыу хәүефе янаған һәм көсөргәнешле участкаларға ебәрелде. М5 (Һамар – Өфө – Силәбе), М7 (Мәскәү – Өфө – Ырымбур) федераль трассаларында, Өфө – Инйәр – Белорет, Өфө – Шишмә – Ҡырғыҙ-Миәкә, Өфө – Яңауыл йүнәлештәрендә ЮХХДИ хеҙмәткәрҙәре көсәйтелгән режимда эшләй. Маҡсат - юлдағыларға ярҙам күрһәтеү.

Ауыр һауа торошона, шторм тураһында иҫкәртеүҙәргә бәйле, юл хәрәкәтендә ҡатнашыусыларҙың барыһына ла һауа торошо яҡшырғансы юлға сыҡмай торорға кәңәш итәм, айырыуса төнгө ваҡытта, – тип халыҡҡа мөрәжәғәт итте республиканың ЮХХДИ идаралығы начальнигы Владимир Севастьянов.  

Епшек ҡар юл хәрәкәтен һиҙелерлек ауырлаштыра. Тиҙлек режимын арттырмағыҙ, автомобилдәр араһында тейешле арауыҡты һаҡлағыҙ, хәүефһеҙлек ҡайышын эләктерергә онотмағыҙ. Йәйәүлеләргә юл аша тик билдәләнгән урындарҙан һәм хәүеф янамағанына инанғас ҡына сығырға кәңәш ителә. Уяулыҡты юғалтмайыҡ, ҡағиҙәләрҙе теүәл үтәйек!

Фото: ЮХХДИ (скриншот).