Һыйыр мөгөҙөн һындырыҙай сатлама һыуыҡтар көтөлә

Рәсәй Ғәҙәттән тыш хәлдәр министрлығының Башҡортостан буйынса Баш идаралығынан хәбәр итеүҙәренсә, республиканың ҡайһы бер райондарында тағы ла ҡатыраҡ һыуыҡтар көтөлә, минималь температура төндә -40, -45° тиклем түбәнәйәсәк. Юлдарҙың ҡайһы бер участкаларында томан төшә, күреү һәләте 500 метр һәм унан да кәмерәк буласаҡ.

 9 ғинуарҙың 20.00 сәғәтенән 10 ғинуарҙың 20.00 сәғәтенә тиклем бер аҙ болотло була. Ел төньяҡтан, төньяҡ-көнбайыштан секундына 5 метр тиҙлектә иҫәсәк. Төндә һауа температураһы -33, -38 градус, урыны менән сатлама һыуыҡ -40, -45 градус, көндөҙ -26, -31 градус, урыны менән -21 градусҡа тиклем етәсәк. Юлдарҙың ҡайһы бер участкаларында боҙлауыҡ, төндә һәм иртәнсәк томан, күреүсәнлек 500 метрға тиклем һәм унан да кәмерәк буласаҡ.

Өфөлә лә өлөшләтә болотло. Ел төньяҡтан, төньяҡ-көнбайыштан секундына 5 метр тиҙлектә иҫәсәк. Һауа температураһы төндә -36, -38 градус, ҡала ситендә - 40, -42 градусҡа етәсәк, көндөҙ -29, -31 градус, ҡала үҙәгендә -25 градусҡа тиклем көслө һыуыҡ буласаҡ.

Бындай һыуыҡтарҙа өйҙә ултырыу хәйерле, юлға сыҡмағыҙ. Шулай уҡ, йортто йылытам тип, янғын хәүефһеҙлеге ҡағиҙәләре тураһында ла онотмағыҙ.

Илнур Һиҙиәтов фотоһы.