Бөтә яңылыҡтар
Хәүефһеҙлек
31 Ғинуар 2023, 14:00

"Ҡара дүшәмбе" булды: алты кешенең ғүмере өҙөлдө

Ошоға бәйле Башҡортостандың Ғәҙәттән тыш хәлдәр буйынса комитеты рәйесе Фәрит Ғүмәров халыҡҡа мөрәжәғәт итте.

"Ҡара дүшәмбе" булды: алты кешенең ғүмере өҙөлдө
"Ҡара дүшәмбе" булды: алты кешенең ғүмере өҙөлдө

Алдан хәбәр итеүебеҙсә, республикала янғынға бәйле хәл киҫкен тора. Рәсми мәғлүмәттәр буйынса, ғинуарҙа республикала 36 кеше һәләк булған. Былтырғыға ҡарағандан өс тапҡырға күберәк!

Ошо айҡанлы Башҡортостандың Ғәҙәттән тыш хәлдәр буйынса комитеты рәйесе Фәрит Ғүмәров рспублика халҡына мөрәжәғәт итте:

"Хөрмәтле республика халҡы!

Йыл башынан фажиғәле тамамланған янғындар һаны ҡырҡа артты. Ғинуарҙа республика биләмәһендәге янғындарҙа 36 кеше һәләк булды. Был уҙған йылдың ғинуар айы менән сағыштырғанда өс тапҡырға күберәк.

Ете янғында һәләк булыусылар бер юлы ике-дүрт кеше булды: Өфө ҡалаһында, Стәрлебаш, Дүртөйлө, Ишембай һәм Ейәнсура райондарында.

Шуны ла билдәләп үтәм, 16 ғинуар "ҡара дүшәмбе" булды – янғындарҙа алты кешенең ғүмере өҙөлдө.

Кеше ғүмерҙәрен өҙгән янғындарҙың төп сәбәптәре билдәле һәм уларҙың өсәүһе:

1) Тәмәке тартҡанда ут менән һаҡһыҙ эш итеү;

2) Электр ҡорамалдарын тейешенсә урынлаштырмау һәм файҙаланыу;

3) Мейестәрҙе дөрөҫ ҡулланмау.

Тышта һыуыҡ һәм күптәр өйҙә йәки верандала тәмәке тарта. Ғинуар янғындарында 13 кешенең һәләк булыуының яҡынса сәбәбе тап ошо хәл булған. Фажиғәғә тарымаҫ өсөн һүндерелмәгән тәмәкене ырғытмағыҙ, бина эсендә тәмәке тартмағыҙ!

Электр селтәренә көсөргәнеш төшөрмәгеҙ, ҡулдан эшләнгән һәм төҙөк булмаған электр йылытҡыстарын ҡабыҙмағыҙ! Ғинуарҙа электр ҡорамалдарының төҙөк булмауы арҡаһында утта 15 кеше һәләк булды.

Яғылған мейестәрҙе ҡарауһыҙ ҡалдырмағыҙ. Ғинуарҙа мейес йылытыуҙы дөрөҫ ойоштормау һәм файҙаланыу арҡаһында алты кеше һәләк булды.

Эскән туғандарығыҙҙы, дуҫтарығыҙҙы ҡарап тороғоҙ, шулай уҡ балаларҙы ла үҙҙәрен генә янғыҙ ҡалдырмағыҙ!

Утты үҙаллы һүндерергә тырышмағыҙ!

Балаларығыҙ менән бергә ут сыҡҡан осраҡта хәүефһеҙлек ҡағиҙәләрен үтәү тәртибен өйрәнегеҙ. Был һаҡланыу тәртибен белгән осраҡта күп кенә фажиғәләргә юл ҡуймаҫҡа мөмкин ине.

Торлаҡты янғынды иҫкәртеү ҡорамалдары менән йыһазландырыу ҙа һөҙөмтәле сара булып тора. Ошо бәләкәй сиреналар ярҙамында республикала 934 кеше, шул иҫәптән 341 бала ҡотҡарылды. Мәҫәлән, 10 ғинуарҙа таң менән Нуриман районында янғын һүндереү ҡорамалының тауышынан уянған биш кеше, шул иҫәптән өс бала янған йорттан сығып өлгөргән.

Хәтерегеҙҙә тотоғоҙ, янғын хәүефһеҙлеге ҡағиҙәләрен үтәмәү ҡайғыға, туғандарҙың, яҡындарҙың күҙ йәштәренә килтерә. Шуға күрә һәр ваҡыт янғын хәүефһеҙлеге талаптарын теүәл үтәгеҙ! Туғандарығыҙға һәм башҡаларға уларҙы боҙоуға юл ҡуймағыҙ! Тик бергәләп кенә үҙебеҙҙе һәм яҡындарыбыҙҙы ут менән бәйле фажиғәләрҙән һаҡлай алырбыҙ!"

Иҫегеҙгә төшөрәбеҙ, янғын сыҡҡан осраҡта шунда уҡ "101", "112" телефондарына шылтыратығыҙ.

Фото: vk.com/goskomitetrb

"Ҡара дүшәмбе" булды: алты кешенең ғүмере өҙөлдө
"Ҡара дүшәмбе" булды: алты кешенең ғүмере өҙөлдө
"Ҡара дүшәмбе" булды: алты кешенең ғүмере өҙөлдө
"Ҡара дүшәмбе" булды: алты кешенең ғүмере өҙөлдө
"Ҡара дүшәмбе" булды: алты кешенең ғүмере өҙөлдө
"Ҡара дүшәмбе" булды: алты кешенең ғүмере өҙөлдө
"Ҡара дүшәмбе" булды: алты кешенең ғүмере өҙөлдө
"Ҡара дүшәмбе" булды: алты кешенең ғүмере өҙөлдө
Автор:Рәмилә Мусина
Читайте нас: