Белоретта көслө янғын булған

Рәсәй Ғәҙәттән тыш хәлдәр министрлығының Башҡортостан буйынса Баш идаралығынан хәбәр итеүҙәренсә, Белорет районының Тирлән ауылында бөгөн йорт янған.

Ведомствонан белдереүҙәренсә, янғын һүндереүселәргә һуңлап хәбәр иткәндәр. Ваҡиға урынына шунда уҡ ҡотҡарыусылар һәм башҡа ашығыс хеҙмәттәр барғанда 9х6 йортто, һарайҙы, шулай уҡ яҡындағы 6х7 метр ҙурлығындағы йортто, ихаталағы биналарҙы һәм мунсаны ут ялмап алған булған. Етмәһә, тағы ла бер йорттоң ҡыйығына ут күскән.

Янғын һүндереүселәр ғүмерҙәрен ҡурҡыныс аҫтына ҡуйып, асыҡ утҡа ҡаршы көрәшә һәм бер йортто алып ҡалыуға өлгәшә. Утты һүндереү юғары дәәжәлә алып барыла – 18 кеше һәм биш техника йәлеп ителә.

Ҡыҙғанысҡа ҡаршы, уттан ҡатын зыян күргән, уны дауаханаға алып киткәндәр.

Ведоствонан хәбәр итеүҙәренсә, кеше ғүмерен өҙөүгә бәйле янғындар йышыраҡ ял көндәренә тура килә. Уларҙың күбеһенең сәбәбе – һәләк булған кешеләрҙең ут менән һаҡһыҙ эш итеүе.

– Янғын хәүефһеҙлеге ҡағиҙәләрен үтәргә, электр селтәренә артыҡ көсөргәнеш төшөрмәҫкә, йоҡлар алдынан электр приборҙарын һүндерергә, мейестә ут янғанда ҡарап торорға кәрәк.

Түшәктә тәмәке тартыу, бигерәк тә иҫерек хәлдә, йыш ҡына үлемгә килтерә.

Яңғыҙ оло йәштәге граждандарға һәм балаларға айырыуса иғтибар биреүегеҙҙе һорайбыҙ.

Фатирҙа газ еҫе аңҡыһа, шунда уҡ газ үткәргес кранын ябығыҙ. Был осраҡта электр приборҙарын һүндермәгеҙ һәм ҡабыҙмағыҙ. Ут тоҡандырмағыҙ.

Берәй хәл килеп тыуған осраҡта, 101 йәки 112 телефон һандарына шылтыратығыҙ.

Һаҡ булығыҙ һәм үҙегеҙҙһе һаҡлағыҙ! – тип иҫкәртәләр ведомствонан.

Фото: @mchsrb.