Киң далалы Хәйбулла районында ат урлау осраҡтары йыш теркәлә. Быға райондың Ырымбур өлкәһе менән сиктәш булыуы ла булышлыҡ итмәй ҡалмайҙыр. Ошо көндәрҙә Хәйбулла районы Сәғит ауылы янында тибендә йөрөгән ике бейәне урлаған ирҙе Рәсәй Эске эштәр министрлығының Хәйбулла районы буйынса бүлеге Ырымбур өлкәһе хеҙмәттәштәре менән тотҡан.
Ат ҡарағы - Ырымбур өлкәһендә йәшәгән 42 йәшлек ир булып сыҡҡан. Ул ҡасандыр ошондай уҡ енәйәт эше өсөн хөкөм ителгән булған. Аттарҙы ҡыуып алып китеп, аҙаҡ һатырға теләгән.
Ир ҡылған ғәйебен таныған һәм Башҡортостандың Хәйбулла районына йылҡы урлауға алдан әҙерләнеп килеүе хаҡында һөйләгән. «ГАЗель» машинаһын Аҡъяр-Сәғит автомобиль юлында ҡалдырып, тибенгә тиклем йәйәүләп барып һәм малҡайҙарҙы берәмләп алып киткән.
Осраҡ буйынса енәйәт эше ҡуҙғатылған, урланған аттар хужаларына ҡайтарылған.
Ат хужаларына иғтибарлы булырға, аттарын ҡарап, уларҙы өйҙәрендә тоторға кәңәш ителә. Аҙаҡ һуң булып ҡуймаһын...
Фото: "Башинформ"