59 урман янғыны теркәлгән

Быйыл республикала хәүефле янғын миҙгеле 31 мартта уҡ башланды. 17 апрелдә иһә янғынға ҡаршы махсус режим тураһында бойороҡ баҫылды.

Хәүефле янғын миҙгеле ғәмәлдә булған осорҙа урман фонды биләмәһендә 59 урман янғыны теркәлгән, 873,72 гектар майҙан зыян күргән. Ут сығыуҙың күп осрағында кеше ғәйепле.

Урмандарға һәм уларҙағы тәбиғәткә килтерелгән зыян күләме яҡынса 3,5 миллион һум (10 урман янғыны буйынса), янғын һүндереүгә киткән сығымдар бер миллион һум тәшкил итә.

Бөтә янғындар буйынса материалдар процессуаль ҡарар ҡабул итеү өсөн Рәсәй Ғәҙәттән тыш хәлдәр министрлығының Башҡортостан буйынса Баш идаралығының тәүтикшереү органдарына ебәрелгән, шуларҙың икеһе буйынса енәйәт эштәре ҡуҙғатылған. Урман янғындарында ғәйепле булған туғыҙ кеше асыҡланған. Хоҡуҡ боҙоусылар республиканың Күгәрсен, Баймаҡ, Әбйәлил, Йылайыр, Учалы, Белорет, Бөрйән райондарында асыҡланған.

Хәүефле янғын миҙгеле башланыу менән урмандарҙа янғын хәүефһеҙлеге ҡағиҙәләрен боҙоуҙың 19 осрағы асыҡлана. Административ штрафтарҙың дөйөм суммаһы 365 мең һум тәшкил итә.

Башҡортостан Республикаһы Урман хужалығы министрлығы урман янғындарына юл ҡуймау һәм урмандарҙа янғын хәүефһеҙлеге ҡағиҙәләрен боҙоу буйынса иҫкәртеү сараларын күрә. Мәҫәлән, йыл башынан алып урман инспекторҙары урман ҡануниәтен боҙоуға юл ҡуймау тураһында 392 иҫкәртеү тапшырған, Федераль дәүләт урман контролен (күҙәтеүен) ойоштороу һәм тормошҡа ашырыуға бәйле мәсьәләләр буйынса 264 консультация үткәргән, 150 иҫкәртеү визиты үткәргән.

Янғынға ҡаршы махсус режим ғәмәлдә булған осорҙа республика халҡын һәм ҡунаҡтарын тағы бер тапҡыр иҫкәртәбеҙ:

- граждандарға урмандарға йөрөү тыйыла (хеҙмәт эшмәкәрлеге урмандарҙа булыу менән бәйле граждандарҙан; урмандарҙы закон менән билдәләнгән тәртиптә файҙаланған граждандарҙан; рекреацион эшмәкәрлек алып барыу өсөн бирелгән урман участкаларында булған граждандарҙан тыш);

- усаҡ яғыуға һәм ҡоро үҫемлектәрҙе, сүп-сар яндырыуға, асыҡ утта, күмерҙә, шул иҫәптән күмерҙә аш әҙерләү өсөн ҡоролмалар ҡулланыуға, ауыл биләмәләрендә һәм ҡала округтарында ҡаралған махсус зоналарҙа, баҡсасылыҡ һәм коммерцияға ҡарамаған баҡсасылыҡ ширҡәттәрендә аш әҙерләү өсөн махсуслашҡан урындарҙан тыш, тыйыла;

- ойошмаларға, ойоштороу-хоҡуҡи формаһы ниндәй булыуына ҡарамаҫтан, янғын хәүефе янаған эштәр, шул иҫәптән ауыл хужалығы баҫыуҙарында ҡоро үләндәрҙе, ураҡ, ураҡ ҡалдыҡтарын яндырыу, баҫыуҙарҙа усаҡ яғыу, сүп-сар үртәү тыйыла;

- урман фонды ерҙәренән башҡа, ағас ҡалдыҡтарын яндырыу тыйыла;

- автомобиль юлдары һәм юл эргәләрендә, тимер юлдар, юл үткәргестәр, аҙыҡ-түлек үткәргестәре һыҙаттары һәм һаҡлау зоналары сиктәрендә ҡоро үлән яндырыу, усаҡ яғыу, утын, ҡырҡыу ҡалдыҡтары һәм янар материалдар яндырыу, шулай уҡ ҡоро ағастар, ҡыуаҡтар ҡалдырыу тыйыла.

Шуны билдәләп үтергә кәрәк, янғынға ҡаршы махсус режим осоронда урмандарҙа янғын хәүефһеҙлеге ҡағиҙәләрен боҙған өсөн административ һәм енәйәт яуаплылығы ҡаралған. Был талаптарҙы боҙған граждандар өсөн 50 мең һумға тиклем административ штраф ҡаралған, әгәр янғын хәүефһеҙлеге ҡағиҙәләрен боҙоу һөҙөмтәһендә урман янғыны сыҡһа, 60 мең һумға тиклем административ штраф, шулай уҡ Рәсәй Енәйәт кодексының 261-се статьяһының 1-се йәки 2-се өлөшө буйынса енәйәт яуаплылығы ҡаралған (өс йылға тиклем иркенән мәхрүм итеү янай).

Юридик шәхестәр өсөн бер миллион һумға тиклем административ штраф ҡаралған, ә урман янғыны сыҡҡанда - ике миллион һумға тиклем.

Иҫегеҙгә төшөрәбеҙ! Әгәр урманда янғын сыҡҡанын күрһәгеҙ, шунда уҡ Урман хужалығы министрлығының тәүлек әйләнәһенә эшләгән төбәк диспетчер хеҙмәтенә 8-347-218-14-14 телефоны буйынса йәки урман һағының "ҡыҙыу линия"һына 8-800-100-94-00 телефоны буйынса хәбәр итегеҙ.

Фото: Башҡортостан Урман хужалығы министрлығының матбуғат хеҙмәте.