Мәскәү өлкәһендә ҡот осҡос теракт

Әлеге ваҡытта Мәскәү өлкәһенең Красногорск ҡалаһынан ҡурҡыныс яңылыҡтар килде.

Бында урынлашҡан “Крокус Сити Холл”да теракт булған. Хәбәр ителеүенсә, яҡынса мәғлүмәттәр буйынса, 3-тән 15-кә тиклем ҡоралланған кеше бинаға килеп ингән һәм кешеләргә ата башлаған. Быны шаһиттар интернетҡа һалған видеояҙмалар аша күрергә була. 

Был ваҡытта “Крокус”та “Пикник” рок-төркөмөнөң концерты булған. Хәбәр ителеүенсә, төркөм атыш башланған ваҡытта сәхнәгә сығып өлгөрмәгән, улар гримеркала булған. Артистар зыян күрмәгән, тиелә. 

Ҡорбандарға килгәндә, уларҙың һаны - яҡынса 40. Йөҙләгән кеше йәрәхәтләнгән. Тик был һандар яҡынса. Атыш менән бер рәттән бинала шартлау булған, әлеге ваҡытта уның ҡыйығы яна, ҡуйы төтөн килә.

Хәбәр ителеүенсә, был - алдан әҙерләнгән теракт. Әлеге ваҡытта “Крокус”тың аҫтағы ҡаттарында кешеләр ҡалған, яҡынса ике йөҙ кеше, тиелә, уларҙың сығыу юлын ут бүлгән. Урынға “Ашығыс ярҙам” машиналары, полиция һәм башҡа хеҙмәттәр юлланған.

Фото: Телеграм.