Үҙ балаларын үлтереп ҡасҡан Мазов тураһында нимә билдәле?

Иҫегеҙгә төшөрәбеҙ, 2019 йылдың октябрендә Мазов ҡатыны менән талашҡандан һуң, ике улы менән ғәйеп була. Күп тә үтмәй, хоҡуҡ һаҡлаусылар ирҙең төҙөлөш магазинында арҡан һатып алыуын асыҡлай. Ир өйөнән һауа тултыра торған матрас та ала. Артабан Өфө йылғаһына барып, матрасты тултыра, арҡанға балаларҙы бәйләй ҙә...  Ошонда уҡ, Инорс микрорайонында, Мазовтарҙың машинаһы табыла.

2020 йылдың июнь аҙағында биш йәшлек малайҙың кәүҙәһе Өфөнөң Калинин районындағы Ағиҙел йылғаһында, ә һигеҙ йәшлектеке Дим районы биләмәһендә табыла. Ә һәләк булыусыларҙың атаһы һаман табылмаған. Алдан хәбәр ителеүенсә, Артем Мазовты енәйәт эше сиктәрендә ғәйепләнеүсе булараҡ федераль эҙләүгә иғлан итәләр. Уның ҡайҙалығын асыҡлаған өсөн ярты миллион һум күләмендә аҡса ла вәғәҙәләйҙәр. “Башинформ” агентлығына хоҡуҡ һаҡлау структураларындағы үҙ сығанағынан билдәле булыуынса, Мазов инде оҙаҡ ваҡыт халыҡ-ара эҙләүҙә.

“Мазов енәйәт ҡылғандан һуң ҡасҡан тигән төп версия бар. Ул әлегә халыҡ-ара эҙләүгә бирелгән. Уның паспортын алмаштырып, сит ил территорияһында йәшенеүе ихтимал тигән фараз бар, – тине мәғлүмәт агентлығы әңгәмәсеһе. – Бер нисә йыл буйына эҙләүҙәр һөҙөмтәһендә уның кәүҙәһе табылмауы ла ошо версия файҙаһына һөйләй”.

Атаһы һәм балалары юғалған урында эҙләү саралары үткәрелә. Һөҙөмтәлә балаларҙың кәүҙәләре табыла, ә аталарыныҡы – юҡ. Әңгәмәсе шулай уҡ Мазовтың шпион фильмдары һәм детектив әҙәбиәт менән мауығыуын хәбәр итә. Уға суперагент Джейсон Борн кеүек персонаждар оҡшаған. Йәғни, был персонаж йәшеренә, шәхесен үҙгәртә белә. Шуныһы билдәле: Мазов енәйәт ҡылыр алдынан интернетта башҡа дәүләттәрҙә ҡунаҡханалар эҙләгән, шулай уҡ ата-әсәһенә кәрәк саҡта ғына килерен хәбәр иткән.

Әлегә балаларын үлтергән Мазовты эҙләү дауам итә...

Фото: социаль селтәрҙәр.