“Ярар әле янымда балалар булманы”

Бөгөн иртә менән билдәле яҡташыбыҙ Рөстәм Нәбиев юл-транспорт ваҡиғаһына эләккән. Ул таң менән ҡыҙын мәктәпкә алып барған, ә кире ҡайтышлай был хәл булған. Ҙур йөк машинаһы – бетон бутаусы “КамАЗ” “Ниссан Кашкай” машинаһына барып бәрелгән, бер юлы Рөстәмдең “Порш” машинаһына ла эләккән. Блогер социаль селтәрҙә күрһәтеүенсә, уның ни бары көҙгөһө емерелеп төшкән. Ә быны икенсе машинаның хәле шәптән түгел.

– Ярар әле янымда балалар булманы. Ҡыҙымды мәктәптә ҡалдырып өлгөргәйнем. “Ниссан” машинаһында ултырған ҡатын да балаларын мәктәптә ҡалдырып ҡайтып барған. Йөк машинаһы уның автомобиленең артын иҙгән. Ә балалар артта ултыра бит... Уны әле ашығыс ярҙам табиптары алып китте, мейеһе һелкенгән булыуы ихтимал, – тине ул.

Аварияла кеше зыян күргәс, унда ҡатнашыусыларҙың бөтәһен дә алкоголгә һәм тыйылған матдәләргә тикшереү көтә. Урынға инспекторҙар килгән һәм хәлде тикшереү башланған.

Юлдарҙа ипле йөрөргә кәрәк! 

Фото: социаль селтәрҙәр.