Көрәш дауам итә. Һөҙөмтәһе нисек булыр?

Бөгөн “Башинформ” агентлығында телефон аша халыҡтан алдап аҡса урлаусыларға ҡаршы көрәш темаһына матбуғат конференцияһы уҙғарылды.

Журналистар алдында Башҡортостан Республикаһы буйынса Эске эштәр министрлығының Мәғлүмәт-коммуникация технологияларын ҡануниәтте боҙоп файҙаланыусыларға ҡаршы көрәш буйынса идаралыҡ етәксеһе Рәмил Төхбәтуллин сығыш яһаны. Уның әйтеүенсә, элекке енәйәт төрҙәре – әйбер урлау, кеше талау, енәйәтсе менән зыян күреүсенең туранан-тура осрашыуы аша ҡылынған башҡа енәйәттәр һаны кәмей бара, әммә мәғлүмәт-коммуникация технологияларын ҡулланған енәйәттәр һаны арта бара.

Быйылғы тәүге биш ай һөҙөмтәләре күрһәтеүенсә, Башҡортостанда ошондай технологияларҙы файҙаланып ҡылынған енәйәттәр  һаны 11 400 осраҡтан ашҡан, улар кешеләргә килтергән зыян һаны 1 миллирад 456 миллион һумға етә. Был төр енәйәттәрҙең төп өлөшө ике ысулға таянып башҡарыла: мобиль йәки интернет элемтәһе каналдары аша социаль инженерия һәм төрлө тауар һатҡанда йәки алғанда. Улар һәр саҡ кешенең хис-тойғоларына тәьҫир итеп башҡарыла. Мәҫәлән, аҡсаһы юғаласағы менән ҡурҡытыу. Зыян күргән кешеләр халыҡтың һәр ҡатламынан бар,  күпселектә улар – килеме ҙур булмаған граждандар, бюджет ойошмалары хеҙмәткәрҙәре, пенсионерҙар, финанс өлкәһен бик аҙ белгән кешеләр, шул иҫәптән дистанциялы банк хеҙмәтләндереүе менән таныш булмағандар.

Автор фотоһы