Аварияла тағы ике кеше һәләк булған

Бөгөн Шишмә - Аксен - Ҡырғыҙ-Миәкә автомобиль юлының 19-сы километрында көслө авария булған.

Республиканың Дәүләт автоинспекцияһа начальнигы Владимир Севастьянов хәбәр итеүенсә, “Митсубиси” һәм “Лада Ларгус” автомобилдәре бәрелешкән.

Дәүләт автоинспекцияһы хеҙмәткәрҙәренең эшмәкәрлеген координациялау һәм бөтә шарттарҙы асыҡлау өсөн респблика Дәүләт автоинспекцияһа начальнигы Владимир Севастьянов үҙе ваҡиға урынына үҙе юлланған.

Һуңғы мәғлүмәттәр буйынса, "Лада Ларгус"тың 40 йәшлек водителе, Дәүләкән йүнәлешендә хәрәкәт иткәндә, уҙып киткәндә һулға боролған “Mitsubishi” пикапы менән бәрелешкән. Бәрелештән һуң “Лада Ларгус” юлда түңкәрелгән.

Юл-транспорт ваҡиғаһы һөҙөмтәһендә “Лада Ларгус” автомобиленең ике пассажиры ашығыс медицина ярҙамы килгәнгә тиклем вафат булған. Водитель үҙе һәм уның тағы ике пассажиры дауаханаға оҙатылған. Сит ил машинаһы водителе зыян күрмәгән.

Фото: БР Дәүләт автоинспекцияһынан.