Үҙҙәре лә төтөнгә тонсоға

Салауат районының Малаяҙ ауылында июнь аҙағында торлаҡ йортта ҙур янғын сыға.

Ошо ауылда йәшәгән 24 йәшлек Виталий Шамиев һәм 40 йәшлек Илнур Хужин төтөндө күреп, йүгереп киләләр, ҡапҡа һәм ишектәрҙе емереп өйгә инәләр. Унда төтөн эсенән пенсионерҙарҙы табып, саф һауаға сығарып ҡуялар. Ныҡ ҡына төтөн еҫкәгәнлектән, ололарға, әлбиттә, медицина ярҙамы талап ителгән. Ҡотҡарыусы ирҙәр ҙә еңелсә йәрәхәттәр ала.

Ҡыйыу ирҙәрҙең береһе – Виталий Шамиев Салауат районындағы “Беренселәр хәрәкте”ндә белгес, әүҙем тормош алып бара, спорт менән шөғөлләнә.

Икенсеһе - Илнур Хужин нефть һәм газ компанияһында хеҙмәт итә, ике бала атаһы.

Уларҙың үҙ-үҙҙәрен аямай ут эсенә инеп, ситтәргә ярҙам итеүе кешелеклелек, изгелек миҫалы булып тора. Афарин! Бәлә-ҡаза урап үтһен, ә ошондай изге күңелле кешеләр күберәк булһын!