Бер юлы дүрт кешенең ғүмере өҙөлгән...

Тәтешле районында Дәүләт автоинспекцияһы хеҙмәткәрҙәре дүрт кеше һәләк булған юл-транспорт ваҡиғаһы урынында эшләй.

Яҡынса билдәле булыуынса, төнгө сәғәт өс тирәһендә Борай - Иҫке Балтас - Көйәҙе автомобиль юлының 88-се саҡрымында «Лада Гранта» менән «Газель» бәрелешкән.

Көслө бәрелеүҙән еңел автомобиль водителе һәм уның өс пассажиры (өс ир-егет һәм бер ҡатын-ҡыҙ) ваҡиға урынында йән биргән. «Газель» водителе һәм уның пассажиры төрлө йәрәхәттәр менән дауаханаға оҙатылған.

Әлеге ваҡытта Дәүләт автоинспекцияһы идаралығы хеҙмәткәрҙәре һәм Башҡортостан Республикаһы буйынса Эске эштәр министрлығының ЭКЦ автотехникаһы юл-транспорт ваҡиғаһы сәбәптәрен асыҡлау өсөн шунда юлланған.

Һанаулы ғына көндәрҙән Яңы йыл байрамдары етә. Юлдарҙа һаҡ булығыҙ, тиҙлек режимын арттырмағыҙ, ҡаршы һыҙатҡа сыҡмағыҙ! Үҙегеҙҙе һәм яҡындарығыҙҙы һаҡлағыҙ!

Фото: телеграм

Беҙҙең МАХ каналына https://max.ru/gazetabashkortostan ҡушылығыҙ!