Бал ҡорто саҡһа, нимә эшләргә?

Бал ҡорто саҡһа, иң беренсе, әлбиттә, тиҙ арала табипҡа мөрәжәғәт итергә кәрәк. Әгәр инде ундай мөмкинлегегеҙ юҡ - ҡырҙа, урмандаһығыҙ икән - тәүге ярҙам сараларын ҡулланырға кәрәк буласаҡ.

1. Ҡаяуын алығыҙ (әгәр ул ярала ҡалһа). Бал ҡортоноң ҡаяуы киртләсле, шуға ла тирелә тороп ҡалыусан. Уны пинцет ярҙамында йәки тырнаҡ менән ипләп кенә алырға кәрәк. Ҡаяуҙың үҙенә йүнәлеш тотоғоҙ, ә ағыулы “тоғо”на теймәгеҙ – организмға нығыраҡ таратыуығыҙ ихтимал.

Ҡаяуҙы бармаҡтар менән һығырға ярамай.

2. Бал ҡорто саҡҡан урынды һабынлы һыу менән йыуығыҙ – ағыуҙың ҡалдыҡтарын бөтөрөргә, инфекция хәүефен аҙайтырға кәрәк.
3. Сағылған урынға 10-20 минутҡа һалҡын нәмә һалығыҙ (мәҫәлән,туҡымаға төрөлгән боҙ). Был сара ауыртыуҙы, шеште кәметер.
4. Организмдан ағыу тиҙерәк сығып бөтһөн өсөн, күп итеп һыу эсегеҙ.
5. Ҡысына башлаһағыҙ, аллергия билдәләре күренһә, гистаминға ҡаршы препараты эсергә тәҡдим ителә. Мәҫәлән, “Супрастин”, “Тавегил”, “Кларитин” һ.б. Уларҙың дозаһын табип билдәләргә тейеш.
6. Аллергияға ҡаршы ҡулланыла торған май булһа, шуны һөртөгөҙ.
7. Яра урынын тырнамағыҙ – ағыуҙың таралып китеүе, инфекция инеү хәүефе артыуы ихтимал.
8. Мөмкинлек табып, тиҙ арала табипҡа мөрәжәғәт итегеҙ.

Ярамай!

* Бал ҡорто саҡмаһын өсөн, ул яҡында икән, киҫкен хәрәкәттәр яһамағыҙ.

* Үләндә яланаяҡ йөрөмәгеҙ.

* Тәбиғәткә, баҡсаға сыҡҡанда хушбуй һөртмәгеҙ.

* Тәнегеҙҙе ябып торған кейемдә булығыҙ.

 Айрат Нурмөхәмәтов фотоһы.

Беҙҙең МАХ-тағы каналға ҡушылығыҙ: https://max.ru/gazetabashkortostan