“Телефон кәләшле итте...”

Арыттырған, телевизор ҙа ҡарағы килмәй, һүндерҙем дә йоҡларға ятырға әҙерләнәм. Иртән иртүк торорға кәрәк. Ҡапыл телефон "һайрап" ебәрҙе. Таныш түгел номер. Алырғамы, юҡмы? Алдым. Ҡатын-ҡыҙ тауышы:”Сәйфетдин?” “Юҡ, Марат”,- тим. Аңлаштыҡ, баҡһаң, ул күптән аралашмаған ике туған ағаһын эҙләй икән. Яҡын туғандары ауырып киткән, мотлаҡ хәбәр итергә кәрәк. Телефон номерын нисек иҫендә ҡалдырған, шулай йыйған.

Иртәгәһенә яңы танышыма шылтыратмай булдыра алманым: ағаһын таптымы икән? Һүҙҙән һүҙ сығып, оҙаҡ ҡына әңгәмәләштек. Мин уны күрмәһәм дә, алсаҡлығын, һөйләшеүен, көлөүен үҙ иттем, телефон аша ла кешене оҡшатып була икән. Икебеҙҙең мәнфәғәттәрҙә уртаҡлыҡтар барлығы асыҡланды. Ә бына осрашырға оҙаҡ ҡына ҡыйманым. Юҡҡа хәүефләнгәнмен, тәүге осрашыуҙа уҡ бер-беребеҙҙән башҡа йәшәй алмауыбыҙҙы аңланыҡ.

Өйләнештек, тормош йәме – әсәһенә һыу тамсыһындай оҡшаған ҡыҙыбыҙ үҫә. Нимә әйткем килә? Кеше үҙенең мөхәббәтен ҡайҙа табасағын бер ҡасан да белмәй. Әгәр ҙә теге ваҡытта телефонды алмаһам, мин уны осрата алыр инемме?..

Фото: Love-is.org.