“Исемде оҙаҡ һайлай торғас, таптым!”

Сибай ҡалаһының ЗАГС бүлеге хеҙмәткәрҙәре Гөлсиә һәм Илфат Мусиндар ғаиләһен икеләтә шатлыҡлы ваҡиға менән ҡотланы. Бындай күңелле, иҫтәлекле байрам көн дә булып тормай шул,  ә игеҙәктәр тыуыуы һирәктәр өлөшөнә төшкән көмөш.

25 июлдә 3260 һәм 3270 грамм ауырлығында Айбулат һәм Шайморат улдарының донъяға килеүен ата-әсә көтөп алды. “Шулай ҙа беҙ  игеҙәк сабыйҙарыбыҙҙың береһе ҡыҙ булыуына өмөтләнгәйнек, ни өсөн тигәндә ғаиләбеҙҙә ике ҡыҙ һәм ике малай үҫә – Айзилә, Нурсилә һәм Нурсолтан, Тамерлан.  Игеҙәктәргә исемде оҙаҡ эҙләнек, уйлай торғас, таптым – Айбулат һәм Шайморат тигән исемдәргә туҡталдыҡ”,– ти Илфат Ғәлимйән улы.  Малайҙарҙың исемдәре ысынлап та матур, ҡолаҡҡа ла, күңелгә лә ятышлы. Мусиндарҙың берҙәм ғаиләһенә һаулыҡ, бәхет именлек теләйбеҙ!

Фото: Юстиция эштәре буйынса дәүләт комитеты.