Танышыуҙарына ике аҙна тигәндә егет һөйгәненә өйләнешергә тәҡдим яһай...

Илле йыл буйы иңгә-иң терәп, һауыт-һаба шылтыратмай  донъя көтөп, балалар үҫтереп  ҡара! Әйтеүе генә рәхәт. Алтын туйға  бөтә һынауҙарҙы  лайыҡлы үтеп, мөхәббәттәрен ошоғаса һаҡлай алған парҙар ғына килеп етә ала. Рәйлә һәм Рәжәп Кинйәбаевтар оҙаҡ йылдар дауамында  яҡташтарының хөрмәтен һәм һоҡланыуын тойоп йәшәй. Ҡайғыһын да, шатлығын да кисерә алған ғаилә Федоровка районының Юлдаш ауылында йәшәй, тип яҙа “Ашҡаҙар таңдары”.

Уларҙың яҙмышын ни бары 15 көн хәл итә.  Рәжәп Муса улы  күп балалы ғаиләлә тырыш, ярҙамсыл егет булып үҫә. Һигеҙ класты тамамлағас, Стәрлетамаҡтағы  һөнәрселек училищеһында ташсы һөнәрен ала.  Армияла хеҙмәт итә.  Ҡайтҡас, хужалыҡта  малсылыҡ тармағында эшләй.

Бер ваҡыт ҡыҙыу ураҡ ваҡытында колхозға Салауат ҡалаһынан бер төркөм ҡыҙҙар ярҙамға килә.  Уларҙың  Рәйлә тигәне, һылыу һәм  алсаҡ ҡыҙ,  егеттең йөрәген яулай. Танышыуҙарына ике аҙна булыу менән егет һөйгәненә өйләнешергә тәҡдим яһай.  Шулай итеп, йәштәр  уйламағанда бик тиҙ яҙмыштарын бергә бәйләй.

Рәйлә Көйөргәҙе районының Ялсыҡай ауылында тыуып үҫә. Салауат ҡалаһы училищеһында штукатур-маляр һөнәрҙәренә эйә була. Тормош ҡорғас, йәштәр  ситкә китергә уйламай. Рәжәптең тыуған ауылында төпләнергә булалар. Ғүмерҙәре намыҫлы хеҙмәттә, татыулыҡта  үтә.  Бына тигән, тырыш, яуаплы дүрт бала тәрбиәләп үҫтерәләр. Ҡыҙғанысҡа ҡаршы, уларҙы ла ҡайғы урап үтмәй,  һөйөклө ҡыҙҙары ҡапыл вафат була.  Улдары Рәсүл ғаиләһе менән Мәләүез ҡалаһында  йәшәй, умартасылыҡ менән шөғөлләнә. Ҡыҙҙары Гөлдәр Росгвардияла хеҙмәт итә, кинйәләре Динир Себерҙә вахта ысулы менән эшләй.

Хәҙерге ваҡытта ғаилә шәхси хужалыҡ тота, мал-тыуар аҫрай, баҡса тәрбиәләй. Улар йәш саҡтан үҙешмәкәрлектә ҡатнаша, концерттарҙа дуэт менән йырлайҙар. Рәжәп Муса улы “Юлдаш” йыр ансамбле составында  конкурстарҙа әүҙем ҡатнашыуын дауам итә.Тормош юлдарының тыныс, имен, балалары һәм ейәндәренең йылыһын һәм хәстәрен тойоп,  оҙаҡ йәшәүҙәрен теләйбеҙ.

Фото: https://ashzori.ru/articles/o-tekh-kto-ryadom/2024-11-14/chelovecheskaya-zhizn-tselaya-kniga-4007463