“Мин Фәйзулла менән үҙемде ышаныслы тоям”

“Именлек” геронтология үҙәгендә яңы ғаилә барлыҡҡа килде. Хеҙмәт ветераны Фәйзулла Сәғәҙиев һәм Анна Самарова дуҫлашып йөрөгәндән һуң ғаилә ҡорорға булды. Уға – 83 йәш, кәләшкә – 76. Һәр береһенең яҙмышы ябайҙан түгел, улар бер-береһенә ышаныслы таяныс, ярҙамсы булырға вәғәҙә итә. Бөйөк Еңеү көнө алдынан улар үҙ ғаиләләрендәге һуғыш батырҙарын ҙур хөрмәт менән иҫкә ала. Фәйзулла Сәғәҙиев – фронтовик улы.

– Тормошҡа шатланып йәшәйәсәкбеҙ, бер-беребеҙҙе ҡараясаҡбыҙ, ярҙам итешәсәкбеҙ, – ти Анна Александровна. – Кәрәк икән, дарыуханаға барасаҡмын, ашарға әҙерләйәсәкмен. Бергәләп ауырлыҡтарҙы еңеүе еңелерәк. Беҙҙең Фәйзулла менән дөйөм мәнфәғәттәребеҙ уртаҡ. Ул бик хәстәрлекле, һәләтле һәм тәрбиәле кеше. Мин үҙемде уның менән ышаныслы тоям.

Фото: Ғаилә, хеҙмәт һәм халыҡты социаль яҡлау министрлығының матбуғат хеҙмәте.