+20 °С
Болотло
Матур үтһен ялығыҙ
7 Март 2021, 12:30
Ҡатын-ҡыҙ бәхете нимәнән ғибәрәт?
Бөгөн БЮТ каналында “Ҡатын-ҡыҙ бәхете биләмәһе” марафоны үтте.
Бөгөн БЮТ каналында “Ҡатын-ҡыҙ бәхете биләмәһе” марафоны үтте. Пандемия арҡаһында телеэфирға күскән сара 8 март байрамы алдынан үткәрелгәнгә тағы ла йәнлерәк, сағыуыраҡ булды.
Тапшырыу барышында саҡырылған ҡунаҡтар ҙа, әҙерләнгән сюжеттар ҙа ҡатын-ҡыҙ бәхетенең сере нимәлә тигән һорауға яуап эҙләне. Эксперттар булараҡ был юлы табиптар, психологтар, башҡа белгестәрҙән тыш, билдәле шәхестәр саҡырылды. Мәҫәлән, “Башинформ” агентлығының баш мөхәррире Руслан Шәрәфетдинов, Башҡортостандың баш Дәүләт автоинспекторы Динар Ғилметдинов, билдәле блогер, десантник һәм спортсы Рөстәм Нәбиев, психолог Асҡар Ислам ҡатын-ҡыҙҙы нисек тағы ла бәхетлерәк итеү, йәшәйешен еңеләйтеү тураһында фекер алышты. Алып барыусылар Альбина Ҡасымханова менән Дмитрий Каретконың һорауҙарына ихлас яуап биргән ҡунаҡтар тормоштарында иң ҡәҙерле ҡатын-ҡыҙ – әсәй икәнлеген билдәләп үтте.
БЮТ каналы хәбәрселәре байрам алдынан Милли архив идаралығы фондына мөрәжәғәт итеп, Башҡортостан тарихына алтын хәрефтәр менән яҙылған ҡатын-ҡыҙҙар тураһында ҡыҙыҡлы сюжет әҙерләгән. Мәҫәлән, Башҡорт АССР-ның халыҡ яҙыусыһы Зәнәб Биишева хаҡындағы яҙмала архивтан табылға видеояҙма айырыуса күңелгә ҡәҙерле булды.
“Ҡатын-ҡыҙ бәхете биләмәһе” асыҡ академияһының ойоштороусыһы һәм авторы – Каринэ Хәбирова был юлы ҡоймаҡ ҡойоу серҙәре менән уртаҡлашты. Ҡоймаҡ – ул милли аш-һыу ғына түгел, күпселек халыҡтарҙа ҡояш символы, ғаиләне бергә туплаған табын йәме. Һәр хужабикәнең үҙенең генә ҡоймаҡ бешереү сере бар. Каринэ Хабирова үткәргән оҫталыҡ дәресе күптәрҙең күңеленә хуш килгәндер.
“Ҡатын-ҡыҙ бәхете биләмәһе” быға тиклем Саҡмағош районына табиптар, белгестәрҙән торған десант ебәргәйне. Тамашасыларға ошо саранан репортаж, Ҡыйғы районы хакимиәте башлығы Зөһрә Гордиенко, райондың эшҡыуар-ҡатын-ҡыҙҙары тураһында сюжеттар күрһәтте.
Тапшырыуҙың һуңғы өлөшө иң ҡыҙығы булғандыр. Студияла Башҡортостандың һәм Татарстандың халыҡ артисы Салауат Фәтхетдинов менән Башҡортостандың атҡаҙанған артисы Элвин Грей осрашты. Артистар ҡатын-ҡыҙҙарҙы 8 март байрамы менән ҡотланы. Үҙҙәренең яҡындары өсөн әҙерләнгән бүләктәр тураһында һөйләне. Был көндө улар ҡатындарын донъя мәшәҡәттәренән арындырырға, кәйефен күтәрергә әҙер, тик бына артистарҙың икеһе лә иҙән йыуырға яратмай икән.
Фото: БЮТ сайтынан алынды.
