“Бәхет биләмәһе”ндә йәшәге килә!

Бөгөн “Торатау” конгресс-холының концерт залы республикабыҙҙың иң алдынғы, иң әүҙем, уңған һәм эшһөйәр аҫыл заттарын “Ҡатын-ҡыҙҙарҙың бәхет биләмәһе”нә йыйҙы. 2019 йылдың авгусынан республика райондарында тамыр йәйгән “Бәхет биләмәһе”нең статусы ла яңырҙы – ул хәҙер Бөтә Рәсәй асыҡ академияһы исемен йөрөтә. Оло сара быйыл икенсе тапҡыр федераль кимәлдә үтә.

“Ҡатын-ҡыҙҙарҙың бәхет биләмәһе” проекты авторы, хәйриә фондының попечителлек советы рәйесе Каринэ Владимировна Хабирова сараны асып, тантанала ҡатнашҡан аҫыл зат вәкилдәрен, төрлө төбәктәрҙән килгән ҡунаҡтарҙы күңеле йыһандай киң, күп ғаиләләр яҙмышын үҙгәртергә өлгөргән, йылы мөхитле “Бәхет биләмәһе”нә аяҡ баҫыуҙары менән ҡотланы, уның эшендә уңыштар теләне.

Башҡортостан Башлығы Радий Хәбировтың сәләмләү һүҙе был юлы ла хис-тойғоларға бай, йөкмәткеле  булды. Ул  республикаға Мәскәү ҡунаҡтары –  актерҙар Людмила һәм Борис Токаревтар ғаиләһе, Рәсәй телевидениеһы тапшырыуҙарын алып барыусы дүрт бала әсәһе Мария Ситтель һәм Татарстандың Йәмәғәт палатаһы рәйесе Зилә Вәлиеваның килеүенә һөйөнөүен, маҡсаттың изге булыуын, бөтә республиканы “бәхет биләмәһенә”әүерелдереү теләген белдерҙе.

“Ниндәй һоҡланғыс республикала йәшәйһегеҙ! Һеҙҙең ҡатын-ҡыҙҙарығыҙ ниндәй матур! – тине Борис Васильевич. – Бөгөн ҡатыным Люда менән беҙҙең никахлашҡан көнөбөҙ. 53 йыл бергәбеҙ! Мөхәббәт тормошта һәр саҡ мөһим, бары сабырлыҡ кәрәк. Һеҙҙең “Бәхет биләмәһе”ндә беҙҙең дә оҙаҡ йәшәгебеҙ килә!”

Яҡташыбыҙ, Татарстан ҡунағы Зилә Вәлиева “Бәхет биләмәһе”нә саҡырыу өсөн ҙур рәхмәт белдерҙе, күршеләр ҡунаҡҡа буш ҡул менән йөрөмәй бит инде, татар дуҫтарыбыҙ үҙҙәренең милли аҙығы – сәксәкте күстәнәскә алып килгән.

Башҡортостан Ҡатын-ҡыҙҙар союзы рәйесе Рәшиҙә Солтанованың ялҡынлы сығышы ла алҡыштар менән оҙатылды. Сара ике көн дауам итәсәк. Уның программаһы бай һәм төрлө. Фойела төрлө йүнәлештәр буйынса консультациялар эшләй, “Мөхәббәт” көрсөк үҙәге кәңәштәре менән уртаҡлаша, балалар өсөн майҙансыҡ бар. Түңәрәк өҫтәлдәр, фекер алышыуҙар, спектаклдәр, тамашалар, эшҡыуар ҡатын-ҡыҙҙар өсөн дәрестәр, психологтар кәңәштәре – барыһы ла буласаҡ. Ҡыҫҡаһы, һәр кем күңелен байытып, осрашыуҙарҙан дәрт-көс алып, ғаиләһен бәхетле итеү өсөн ашҡынып өйҙәренә ҡайтасаҡ.

Айрат Нурмөхәмәтов фотолары.