Иртәгә Баймаҡ гөрләп торасаҡ!

Иртәгә, 11 июндә, Баймаҡ районының Бетерә ауылында ағалы-ҡустылы Илсур һәм Тимур Нәбиуллиндарҙың тәүге тапҡыр Урман һабантуйы үткәрергә йыйыныуы тураһында хәбәр иткәйнек.

Әлеге видеояҙмаларҙа Баймаҡ районының Бетерә ауылында тыуып үҫкән эшҡыуар Илсур Нәбиуллин иртәгә буласаҡ ярыш төрҙәре менән таныштыра. Майикмәк булараҡ билдәле блогер Илсур Ильясов ярыш ҡорамалдарын “бәйгелә ҡатнашыусы” сифатында һынап ҡарай. Белеүебеҙсә, Темәс ауылында йәшәп, үҙ көсө менән йорт төҙөгән Илсур Ильясовҡа эшҡыуар аҙашы, төҙөлөш материалдары биреп, ярайһы уҡ ҙур ярҙам күрһәткәйне.

Йәмле тәбиғәт ҡосағында үтәсәк Урман һабантуйы гөрләп үтеп, матур йолаға әйләнһен.

Фото: видеояҙманан скриншот.