Бер айҙа сәсегеҙ ҡуйы булып үҫәсәк

Розмарин майы – сәстәрҙе тәрбиәләү өсөн популяр сараларҙың береһе. Уның төп файҙаһы баш тиреһендә ҡан әйләнешен көсәйтеүгә ҡайтып ҡала. Ул фолликулдарҙың туҡлыҡлы матдәләр һәм кислород менән тәьмин ителеүен яҡшырта, был уларҙың әүҙем эшләүенә һәм яңы сәстең үҫеүенә булышлыҡ итә. Майҙы даими ҡулланыу сәстәрҙең үҫешен тиҙләтә һәм ҡойолоуына юл ҡуймай.

Розмариндың эфир майы махсус дауалау препараттары менән сағыштырырлыҡ мөғжизә тыуҙырырға һәләтле. Ул ҡан әйләнешен яҡшырта, нәҙек мурт сәстәрҙе нығыта, уларҙы тығыҙыраҡ һәм нығыраҡ итә. Шулай уҡ май иртә сал сәстәр барлыҡҡа килеүгә ҡамасаулай. Бынан тыш, ул ҡауаҡ һәм ҡысытыу кеүек баш тиреһе проблемалары менән һөҙөмтәле көрәшә.

Розмарин майын, сәстәрҙең ихтыяжына һәм торошона ҡарап, төрлө ысулдар менән сәстәрҙе тәрбиәләүҙә ҡулланырға мөмкин. Бер нисә төп ысул.

Сәстәр үҫешен көсәйтеүҙең иң һөҙөмтәле ысулы – розмарин майы менән массаж яһау. Бының өсөн 3-5 тамсы эфир майын йылытылған кокос майы менән ҡушығыҙ һәм сәсегеҙгә һөртөгөҙ. Башлыҡ кейегеҙ йәки сәсегеҙҙе полиэтилен япма менән ябығыҙ, өҫтән таҫтамал менән ҡаплағыҙ. 30 минутҡа ҡалдырығыҙ, һуңынан сәсегеҙҙе шампунь менән йыуығыҙ. Өҫтәмә рәүештә ҡан әйләнешен көсәйтеү өсөн баш тиреһенә 5-10 минут дауамында түңәрәк хәрәкәттәр ярҙамында массаж яһарға мөмкин.

Розмарин майын сәстәрҙе тәрбиәләү буйынса сараларға ҡушырға мөмкин. Өс-дүрт тамсы майҙы файҙаланыр алдынан шампунь йәки кондиционерға тамыҙыу ҙа етә. Был уларҙың туҡлыҡлылығын арттырасаҡ һәм баш тиреһе торошон яҡшыртасаҡ.

Был эфир майын баш тиреһендә таҙа килеш файҙаланырға кәңәш ителмәй: ул юғары концентрациялы тип иҫәпләнә һәм тиҙ ярһыуға, ҡоролоҡҡа йәки хатта тирене яндырыуға килтереүе мөмкин. Эфир майҙары уларҙың концентрацияһын кәметеү һәм тирелә хәүефһеҙ файҙаланыу өсөн даими рәүештә төп майҙа (мәҫәлән, кокос, зәйтүн, миндаль йәки жожоба майына) ҡушыуҙы талап итә. Һөҙөмтәләргә өлгәшеү өсөн розмарин майын даими – аҙнаһына 1-2 тапҡыр ҡулланырға кәңәш ителә.

Розмарин майын ҡулланыр алдынан тест үткәрергә һәм баш тиреһенең ҙур булмаған участкаһына бер нисә тамсы тамыҙып ҡарарға кәрәк. Тирене ҡуҙғытҡанда майҙы ҡулланыуҙы туҡтатырға һәм дерматологҡа йәки трихологҡа консультация һорап мөрәжәғәт итергә кәрәк. Һаҡлыҡ сараларын үтәгәндә һәм розмарин майын дөрөҫ файҙаланғанда  ул күпселек кешеләр өсөн хәүефһеҙ, ләкин шик тыуған осраҡта табип менән кәңәшләшергә тәҡдим ителә.