Етеһе лә супер олатай!

Ҡыйғы районы  Абзай ауылының Мәҙәниәт һарайында бик күңелле сара – “Супер олатай” конкурсы  үтте. Алтмыш йәште  үткән ете олатай бәйгенең ысын геройҙарына әүерелде.

Һәр олатай тормош юлы менән  таныштырып, ғорурланырлыҡ  балалар һәм ейәндәр тәрбиәләү  тураһында һөйләне. Әллә күпме һынауҙар, еңеүҙәр, кисерештәр аша үтергә тура килгән уларға.  Һәр береһе армия хеҙмәтен үткән, ныҡлы ғаилә ҡорған,шуның менән бергә  юмор тойғоһон юғалтмаған, йәшәүҙән йәм табып йәшәргә күнеккән.

Олатайҙарҙың моңло йырҙарын  тамашасылар  алҡышлап ҡаршы алды.Бер олатайҙың ейәндәре генә түгел, бүләләре барлығы һоҡландырҙы. Йомартлыҡ һәм батырлыҡ өлгөһө булған өлкәндәр мул тормош тәжрибәһе, күңел йылыһы менән ихлас уртаҡлашты,бик йылы, матур осрашыу булды.  

 Ете олатайҙың һәр береһе үҙ тормошоноң бәләкәй генә өлөшө менән уртаҡлашып, ауылдаштарына  оло байрам бүләк итте.

Фото: https://vk.com/nashi_kigi1930