Алты район күсмә пунктлы булды

Милли проект буш һүҙ түгел, быны көндәлек тормошта күрәбеҙ, уның емештәренән файҙаланабыҙ. Бына тағы "Тәүге медик-санитар ярҙам системаһын үҫтереү” төбәк проекты буйынса республиканың алты районы тәүге тапҡыр аҙ кеше йәшәгән ауылдар өсөн күсмә фельдшер-акушерлыҡ пункттары алды.

Шулай итеп, улар тиҙҙән Белорет, Баймаҡ, Ейәнсура, Әбйәлил, Йылайыр һәм Бөрйән райондары халҡын ҡабул итә башлаясаҡ. Мобиль ФАП-тар бөтә тейешле ҡорамалдар: электрокардиограф, экспресс-анализатор, кардиомаркер һәм башҡа медицина кәрәк-яраҡтары менән йыһазландырылған. Оҙаҡламай республика тағы шундай 15 күсмә пункт аласаҡ.

Фото: Башҡортостан Һаулыҡ һаҡлау министрлығы