Алдынғы урындарҙың береһендәбеҙ

Үткән йыл һөҙөмтәләре буйынса Башҡортостан илдә турбодвигателдәрҙе һәм газ турбиналарын экспортҡа сығарыу буйынса алдынғы урындарҙың береһен биләй. Был һан 32 процент тәшкил итә.

Бынан тыш, карбонатты (46,3 процент), поливинилхлоридты (14,1 процент) сит илдәргә сығарыу буйынса ла – тәүге урындарҙың береһендәбеҙ, тип хәбәр итәләр республиканың Тышҡы иҡтисади бәйләнештәр буйынса дәүләт комитетында. Тағы шуныһы үҙенсәлекле: Башҡортостан – илдә “Агидол” фенол антиоксидантын һәм терефталь кислотаһын етештергән берҙән-бер төбәк.

Былтыр тағы руда булмаған минераль сеймалды сығарыу – 66,3 процентҡа, руданы экспортҡа ташыу 3,2 тапҡырға артҡан. “Металл һәм уларҙан әйберҙәр” тауар төркөмөндәге баҡырҙы экспортҡа сығарыу – 35,5 процентҡа, никелде ташыу – 14,1 тапҡырға, цинкты – 1,1 тапҡырға, башҡа ҡиммәтле булмаған металдарҙы сит илдәргә ебәреү 15,2 тапҡырға күбәйҙе, – тип белдергән ведомствоның матбуғат секретары Илгизәр Санъяров. – Химия сәнәғәте продукцияһына һәм каучукка килгәндә, был тауарҙар төркөмөндә фармацевтика продукцияһын экспортлау 1,2 тапҡырға артты. Шулай уҡ лак-буяуҙарҙы ситкә һатыу – 1,7, косметик сараларҙы экспортҡа оҙатыу 2,2 тапҡырға күбәйҙе.

Ил Президенты Владимир Путин ҡул ҡуйған май указдарына ярашлы барлыҡҡа килгән “Халыҡ-ара кооперация һәм экспорт” милли проекты һөҙөмтәһендә республикала сеймал һәм энергетик булмаған тауарҙарҙы экспортлау, 2018 йыл менән сағыштырғанда, 2,3 процентҡа артҡан һәм хаҡы ике миллиард долларҙан ашҡан.

Фото: Олег Яровиков.