Яҡташыбыҙға уңыштар теләйбеҙ!

Польшала бөгөнгө шашка буйынса донъя чемпионы, яҡташыбыҙ Тамара Танһыҡҡужина менән ошо исемгә дәғүә иткән поляк спортсыһы Наталия Садовска араһында уйын бара.

Матч туғыҙ партиянан тора. Уларҙың һәр береһендә 12-шәр мәрәй уйнала. Әлегә иҫәп Польша спортсыһы файҙаһына – 20:16. Еңеүсе 54-тән ашыу мәрәй тупларға тейеш. Кисә ял булғайны, бөгөн көрәш дауам итә.

Донъя коронаһына ярыш 3 майҙа тамамланасаҡ. Яҡташыбыҙҙың халыҡ-ара шашка буйынса донъя чемпионы исеменә турнирҙа еңеүен теләйбеҙ!

Тамара Танһыҡҡужина - 1996 йылдан Рәсәй йыйылма командаһы ағзаһы, халыҡ‑ара шашка уйындары буйынса халыҡ‑ара гроссмейстер (2001), Рәсәй гроссмейстеры (1998), күп тапҡыр донъя, Европа һәм Рәсәй чемпионы, республикабыҙҙың Салауат Юлаев ордены кавалеры (2001).

Шашка – логик фекерләү өсөн бик мөһим спорт төрө. Ә донъя кимәлендәге ярыштарҙа яҡташыбыҙҙың ҡатнашыуы үҙе мәртәбә. Был Рәсәй Президенты Владимир Путиндың май указдары нигеҙендә барлыҡҡа килгән “Демография” милли проектының “Спорт – йәшәү нормаһы” проекты бурыстарын да тормошҡа ашырырға ярҙам итә.

Фото: “Башинформ”.