+21 °С
Болотло
Милли проекттар
22 Май 2021, 04:00
Ашнаҡсыларҙы әҙерләйҙәр, тегенселәр кәрәк
Тиҙҙән башҡа йүнәлештәр буйынса ла уҡыуҙар башлана.
Башҡортостандың Мәғариф һәм фән министрлығынан хәбәр итеүҙәренсә, 35 йәштән 55 йәшкә тиклемге 127 кеше “Эшҡыуарлыҡ” һәм Ашнаҡсы эше” йүнәлештәре буйынса һөнәри оҫталыҡ туплай.
Мәғлүм булыуынса, Башҡортостанда Рәсәй Президенты Владимир Путиндың май указы менән раҫланған “Демография” милли проектының “Мәшғүллеккә булышлыҡ итеү” федераль проектына ингән һөнәри уҡытыу һәм өҫтәмә һөнәри белем биреү программаһына ярашлы, Ворлдскиллс программалары буйынса бушлай уҡыта башланылар. Ворлдскиллс программалары буйынса белемде камиллаштырыуға бөтә ил буйынса 14 меңдән ашыу кеше яҙылған да инде. Программа тураһында ентеклерәк https://express.worldskills.ru/ сайтында танышырға мөмкин.
Республикала 117 кеше өсөн эшҡыуарлыҡ йүнәлеше буйынса уҡыу ике белем биреү майҙансығында ойошторолған: Дәүләт халыҡ мәшғүллеге хеҙмәтенең Уҡыу үҙәгендә һәм М. Аҡмулла исемендәге Башҡорт дәүләт университетында. Тағы ла ун кеше Мәләүез индустриаль колледжында ашнаҡсылыҡ эшен үҙләштерә.
Халыҡ мәшғүллеге үҙәгендә әйтеүҙәренсә, республикала йәнә 230 тегенсе, 50 һанлы программа ярҙамында идара ителгән станоктарҙа эшләү операторҙары, финанс, мәғлүмәт технологиялары, мәктәпкәсә белем биреү, медицина өлкәһендәге белгестәр кәрәк. Тиҙҙән ошо йүнәлештәр буйынса уҡыуҙар башлана.
Фото: bashinform.ru
