+24 °С
Ямғыр
Милли проекттар
7 Июнь 2021, 04:30
“Умка” эшләй башлай!
260 балаға иҫәпләнеп, ике ҡатлы итеп төҙөлгән “Умка” исемле балалар баҡсаһы былтырғы йылдың майында уҡ тапшырылғайны. Әммә...
260 балаға иҫәпләнеп, ике ҡатлы итеп төҙөлгән “Умка” исемле балалар баҡсаһы баш ҡаланың Дим биҫтәһендә былтырғы йылдың майында уҡ тапшырылғайны. Әммә техник ҡабул итеүҙән һуң төҙөлөш-монтаж эштәрендә етешһеҙлектәр асыҡланды һәм уларҙы бөтөрөү өсөн өҫтәмә ваҡыт бирелде.
Был яңы, заманса балалар баҡсаһы төҙөлөшөн бойомға ашырыу ил Президенты Владимир Путиндың май указында билдәләнгән “Демография” милли проектына ярашлы мөмкин булды. Мәктәпкәсә учреждение проектының дөйөм хаҡы 250 миллион һум тәшкил итә.
“Умка” балалар баҡсаһы мәктәпкәсә белем биреү эшмәкәрлеге алып барыу өсөн рөхсәт алған. Әлеге көндә төркөмдәрҙе комплектлау эштәре дауам итә. Ошоноң ише ойоштороу мәшәҡәттәре тамамланыу менән баҡса бәләкәстәрҙең шат тауыштарына күмеләсәк.
Мәктәпкәсә учреждение 12 төркөмгә иҫәпләнгән. Бында иркен спорт һәм музыка залдары, методика һәм медицина бүлмәләре, аҙыҡ-түлек блогы һәм кейем-һалым йыйыу урыны булдырылған. Баҡса биләмәһендәге уйын майҙансыҡтары балаларҙың хәүефһеҙлеген иҫәпкә алып эшләнгән.
Яңы баҡсаға бәләкәстәр ҡыуанып йөрөһөн, тигән теләктә ҡалабыҙ!
Фото: building.bashkortostan.ru
