Ваҡытынан алда тамамланды

Республикала М-5 федераль трассаһынан Шишмә ҡасабаһына илткән юл билдәләнгән ваҡыттан алда ремонтланып бөттө. Дүрт километр оҙонлоғондағы был юл Рәсәй Президенты Владимир Путиндың май указы нигеҙендә барлыҡҡа килгән “Хәүефһеҙ һәм сифатлы автомобиль юлдары” милли проекты сиктәрендә яңыртылды.

Төҙөлөш эшен “Башкиравтодор” акционерҙар йәмғиәтенең филиалы -- Шишмә юл ремонтлау-төҙөү идаралығы башҡарҙы. Быйыл марттағы сауҙалашыу һөҙөмтәһендә килешеү хаҡы 28,77 миллион һумдан 22,87 миллион һумға төшөрөлдө.

Башҡортостандың Транспорт һәм юл төҙөлөшө министрлығында хәбәр итеүҙәренсә, эш графикка ярашлы сентябрҙә тамамланырға тейеш булһа ла, подрядсы ваҡытынан алда эшләп бөткән. Ул туҙған юл япмаһын алған, аҫтын ҡом-ҡомташ ҡушылмаһы менән нығытҡан, асфальт-бетон япмаһы түшәгән, юлдың ситен һалған.

Фото: bashinform.ru.