Стәрлетамаҡтағы 25-се коррекция мәктәбендә һәм Белореттағы коррекция мәктәбендә һаулығы буйынса мөмкинлектәре сикләнгән балалар өсөн “Изгелекле мәктәп”тәр асылды. Был эштәр ил Президенты Владимир Путиндың май указы нигеҙендә барлыҡҡа килгән “Мәғариф” милли проекты сиктәрендәге “Заманса мәктәп” федераль проектына ярашлы башҡарылды.

Проекттың маҡсаты – һаулығы буйынса мөмкинлектәре сикләнгән балаларға уңайлы уҡыу шарттары тыуҙырыу. Бындай уҡыусылар белем биреү программаларын яҡшыраҡ үҙләштерәсәк, һөнәр һайлап, тормошта үҙ урынын табасаҡ. “Изгелекле мәктәп”тәрҙәге уңайлы шарттар мәктәп инфраструктураһын яңыртыу иҫәбенә булдырыласаҡ.

Тантаналарҙа БР Дәүләт Йыйылышы – Ҡоролтай рәйесе урынбаҫары Эльвира Айытҡолова һәм республиканың фән һәм мәғариф министры урынбаҫары Әлфиә Ғәлиева ҡатнашты. Улар был эштең мөһимлеген билдәләп, балаларға уңыштар теләне.

“Изгелекле мәктәп”тәрҙәге уҡыу бүлмәләре, оҫтаханалар, коррекция-үҫеш йүнәлешендәге, өҫтәмә белем биреү кабинеттары заманса ҡорамалдар менән йыһазландырылған.  

Бындай мәктәптәр бығаса Октябрьский һәм Бәләбәй ҡалаларындағы коррекция мәктәптәрендә асылғайны.

#ВладимирПутин#национальныепроекты#нацпроекты
#региональныепроекты#регпроекты#нацпроектыБашкортостан